کراچی (لارڈ میڈیا): شہر کے مختلف علاقوں میں پولیس کے مبینہ مقابلوں کے دوران 4 زخمیوں سمیت 5 مبینہ ڈاکو گرفتار کر لیے گئے ہیں۔ گرفتار ملزمان سے اسلحہ، موبائل فون، نقدی اور موٹرسائیکلیں برآمد ہونے کا دعویٰ کیا گیا ہے۔
چھیپا حکام کے مطابق، جوہرآباد پولیس نے فیڈرل بی ایریا بلاک 15 میں مبینہ پولیس مقابلے کے دوران ایک ڈاکو کو زخمی حالت میں گرفتار کیا ہے۔ زخمی ملزم کی شناخت بلال کے نام سے ہوئی، جسے طبی امداد کے لیے عباسی شہید اسپتال منتقل کیا گیا۔
اقبال مارکیٹ پولیس نے اورنگی ٹاؤن کی خلیل مارکیٹ کے قریب مبینہ مقابلے کے بعد 2 ڈاکوؤں کو گرفتار کیا، جن میں ایک زخمی ہے۔ زخمی ملزم زبیر احمد کو عباسی شہید اسپتال منتقل کیا گیا، جبکہ دوسرے ملزم واحد علی کو تھانے منتقل کیا گیا۔
محمودآباد کے قریب ٹی پی ٹو کچرا کنڈی پر بھی پولیس اور ڈاکوؤں کے درمیان مبینہ مقابلہ ہوا، جس میں 2 ملزمان زخمی حالت میں گرفتار کیے گئے۔ چھیپا حکام کے مطابق، دونوں زخمیوں کو جناح اسپتال منتقل کیا گیا جہاں ان کی شناخت اسد اور محمد آصف کے نام سے ہوئی۔
پولیس کے مطابق، گرفتار ملزمان کے قبضے سے اسلحہ، موبائل فون، نقد رقم اور موٹرسائیکلیں برآمد کی گئی ہیں، جبکہ تمام واقعات سے متعلق مزید تفتیش جاری ہے۔
