سندھ میں طلبہ کے لیے مفت اے آئی سمر کیمپ کا آغاز

کراچی (لارڈ میڈیا): گورنر سندھ سید محمد نہال ہاشمی نے موسم گرما کی تعطیلات کے دوران طلبہ کے لیے مفت آرٹیفیشل انٹیلیجنس (اے آئی) سمر کیمپ شروع کرنے کا اعلان کیا ہے، جس کا مقصد نوجوانوں کو جدید ٹیکنالوجی اور ڈیجیٹل مہارتوں سے آراستہ کرنا ہے۔ گورنر ہاؤس میں پریس کانفرنس کے دوران انہوں نے کہا کہ اس پروگرام کے تحت طلبہ کو عملی بنیادوں پر اے آئی کی تربیت مفت فراہم کی جائے گی تاکہ وہ مستقبل کے تقاضوں کے مطابق خود کو تیار کر سکیں۔ سید نہال ہاشمی نے مزید کہا کہ جو طلبہ موبائل فون استعمال کرنے کی صلاحیت رکھتے ہیں، وہ مناسب رہنمائی کے ساتھ اے آئی بھی سیکھ سکتے ہیں۔ اس موقع پر وزیر مملکت فہد ہارون اور دیگر اہم شخصیات بھی موجود تھیں۔ گورنر نے نشاندہی کی کہ تیزی سے بدلتی دنیا میں ابتدائی سطح پر ٹیکنالوجی سے آگاہی ضروری ہے اور ترقی یافتہ ممالک تعلیم و تحقیق میں سرمایہ کاری کرتے ہیں۔ انہوں نے کہا کہ اس پروگرام کا مقصد ملازمت کے مواقع پیدا کرنا ہی نہیں بلکہ خود روزگار کے مواقع پیدا کرنے کے قابل نوجوان تیار کرنا ہے۔ اسکول کی سطح پر اے آئی اور جدید مہارتوں کا تعارف طلبہ کو مستقبل کے چیلنجز سے نمٹنے میں مدد دے گا۔ طلبہ گورنر سندھ کی آفیشل ویب سائٹ کے ذریعے آن لائن رجسٹریشن کر سکتے ہیں۔ یہ اقدام ملک میں ڈیجیٹل خواندگی کو فروغ دینے کی ایک اہم کوشش قرار دیا جا رہا ہے۔