امریکا (لارڈ میڈیا): فیفا ورلڈ کپ اپنے چوتھے ہفتے میں داخل ہو چکا ہے جہاں ابتدائی 48 ٹیموں میں سے نصف سے بھی کم ٹیمیں اب ٹرافی کی دوڑ میں رہ گئی ہیں۔ ناک آؤٹ مرحلے کے راؤنڈ آف 16 کے مقابلے جاری ہیں اور اب تک مراکش، فرانس، ناروے اور انگلینڈ کوارٹر فائنل میں پہنچ چکی ہیں۔
راؤنڈ آف 16 کے دوران کچھ ٹیموں نے شاندار فتوحات حاصل کیں جبکہ کچھ کو سخت مقابلے کا سامنا کرنا پڑا۔ اب مزید چار اہم مقابلے باقی ہیں۔ 6 جولائی کو ڈلاس میں پرتگال اور اسپین، جبکہ سیئٹل میں امریکا اور بیلجیئم مدمقابل ہوں گے۔
7 جولائی کو وینکوور میں سوئٹزرلینڈ اور کولمبیا کا مقابلہ ہوگا، جبکہ اٹلانٹا میں ارجنٹینا اور مصر آمنے سامنے ہوں گے۔ ان مقابلوں کے فاتحین کوارٹر فائنل میں جگہ بنائیں گے۔
کوارٹر فائنل مرحلے کا آغاز 9 جولائی سے ہوگا۔ پہلے میچ میں فرانس اور مراکش بوسٹن میں مقابل ہوں گے۔ 10 جولائی کو لاس اینجلس میں امریکا یا بیلجیئم کی فاتح ٹیم کا مقابلہ پرتگال یا اسپین کی فاتح ٹیم سے ہوگا۔
11 جولائی کو میامی میں ناروے اور انگلینڈ کے درمیان کوارٹر فائنل ہوگا، جبکہ آخری کوارٹر فائنل 12 جولائی کو کنساس سٹی میں ہوگا۔
