کراچی (لارڈ میڈیا) : پاکستان کے معروف اداکار شان شاہد نے کراچی کے اداکاروں پر کڑی تنقید کرتے ہوئے پاکستانی فلم انڈسٹری میں نئی بحث چھیڑ دی ہے۔ شان شاہد نے کہا ہے کہ کراچی کے کچھ اداکار محدود دنیا میں مگن ہیں اور صرف اپنے جاننے والوں کے ساتھ کام کرتے ہیں۔ انہوں نے کہا کہ اصل اداکار وہ ہوتا ہے جو مختلف لوگوں کے ساتھ کام کرے اور خود کو چیلنج کرے۔
شان شاہد نے اپنی نئی فلم ‘سائیکو’ کی تشہیری مہم کے دوران کراچی میں میڈیا سے گفتگو کرتے ہوئے کہا کہ انہیں دس سال تک کراچی میں بلایا نہیں گیا، لیکن جب بھی بلایا جائے گا وہ ضرور آئیں گے۔ انہوں نے کہا کہ کراچی کے بعض اداکار دوسروں کو کھلے دل سے قبول کرنے میں کنجوسی کرتے ہیں۔
شان شاہد نے مزید کہا کہ پاکستانی فلم انڈسٹری کی ترقی کے لیے تمام شہروں کے فنکاروں کو مل کر کام کرنا ہوگا، کیونکہ یہ رویہ انڈسٹری کی ترقی میں رکاوٹ بنتا ہے۔ دوسری جانب کراچی کے اداکاروں کی طرف سے کوئی باضابطہ ردعمل سامنے نہیں آیا ہے۔ شان شاہد نے فلم ‘بلھا’ کی کامیابی کے بعد عیدالاضحیٰ پر ‘سائیکو’ کے ساتھ سینما گھروں میں آنے کی تیاری کر لی ہے۔
