سان فرانسسکو (لارڈ میڈیا) گروک، ایلون مسک کی اے آئی کمپنی ایکس اے آئی نے اپنے امیج جنریشن ٹول کا نیا ورژن ‘امیجن امیج 2.0’ متعارف کروا دیا ہے۔ اس ورژن میں تصاویر کو ایڈٹ کرنے اور واضح تحریر شامل کرنے کی صلاحیت میں بہتری کی گئی ہے۔
ایکس اے آئی نے بتایا ہے کہ ‘امیجن امیج 2.0’ اب گروک کے ویب ورژن کے کوالٹی موڈ کے طور پر دستیاب ہے اور اسے آئی او ایس اور اینڈرائیڈ ایپس میں بھی استعمال کیا جا سکتا ہے۔ یہ ماڈل اب عام صارفین کے لیے دستیاب ہے۔
کمپنی کا کہنا ہے کہ یہ ماڈل صرف خوبصورت تصاویر بنانے کے بجائے حقیقی اور پیشہ ورانہ کاموں کے لیے زیادہ افادیت فراہم کرتا ہے، جس میں درست ترمیم، واضح ٹیکسٹ رینڈرنگ اور معلوماتی درستگی شامل ہیں۔
نئے ماڈل کی خاص بات اس کے ایڈیٹنگ ٹولز ہیں، جن میں میجک وانڈ اور سیگمینٹیشن جیسے فیچرز شامل ہیں جو تصاویر کے مخصوص حصے میں تبدیلی کی اجازت دیتے ہیں۔
گروک کے مطابق ‘امیجن امیج 2.0’ نے امیج جنریشن اور امیج ایڈیٹنگ کے مختلف مقابلہ جاتی جائزوں میں اچھی کارکردگی دکھائی ہے اور یہ ٹیکسٹ ٹو امیج اور امیج ایڈیٹنگ میں دنیا میں دوسرے نمبر پر ہے۔
سوشل میڈیا پر صارفین کے ردعمل میں ملے جلے جذبات نظر آئے۔ کچھ نے نئی صلاحیتوں کو سراہا جبکہ دیگر نے نتائج کو مصنوعی قرار دیا۔
