صنعا (لارڈ میڈیا): یمن کی فوج نے سعودی شہر مدینہ میں حوثی ملیشیا کے ڈرون حملے کے بعد دارالحکومت صنعا اور دیگر علاقوں میں اہم اہداف کو نشانہ بنایا ہے۔
یمن کے حوثی باغیوں نے مدینہ میں بجلی کے پاور سٹیشن کو ڈرون کے ذریعے نشانہ بنایا، جس پر اسلامی اور عرب ممالک نے مذمت کی ہے۔
اتحادی افواج کے ترجمان میجر جنرل ترکی المالکی نے بتایا کہ طیبہ پاور سٹیشن کو 29 ستمبر کی صبح نشانہ بنایا گیا تھا۔ تحقیقات سے معلوم ہوا کہ حوثی ملیشیا نے اس دہشت گرد کارروائی کی منصوبہ بندی کی۔ حکام نے حملے کے بعد آپریشنل جائزہ لیا اور ڈرون کے ملبے کا بھی معائنہ کیا۔
یمنی فوج نے صنعا، صعدہ اور تعز میں حوثیوں کے متعدد مقامات کو نشانہ بنایا ہے۔ صنعا میں اہم اہداف پر کارروائی کی گئی جبکہ صعدہ میں 11 اہداف کو نشانہ بنایا گیا۔ تعز میں حوثیوں کے ایک مربوط فوجی نظام پر 27 فضائی حملے کیے گئے۔
گزشتہ ماہ اتحادی افواج نے حوثیوں کی جانب سے مکہ کی سمت بھیجا گیا ایک ڈرون شہر سے باہر مار گرایا تھا۔ سنہ 2017 میں بھی سعودی فضائی دفاعی نظام نے حوثیوں کی طرف سے مکہ کی جانب داغا گیا بیلسٹک میزائل تباہ کیا تھا۔
حوثی ملیشیا صنعا اور یمن کے ساحلی علاقوں پر کنٹرول رکھتی ہے، جبکہ سعودی عرب 2015 سے یمن کی حکومت کی حمایت میں مداخلت کر رہا ہے۔
