اسلام آباد (لارڈ میڈیا): پاکستان تحریک انصاف کے رکن عامر ڈوگر نے پیٹرولیم مصنوعات کی قیمتوں میں کمی پر حکومت کی کاوشوں کو سراہا۔ قومی اسمبلی کے اجلاس میں انہوں نے بجٹ سفارشات پر اظہار خیال کرتے ہوئے پیٹرولیم لیوی کو کم کرنے کی ضرورت پر زور دیا تاکہ عوام کو مزید ریلیف مل سکے۔
عامر ڈوگر نے ٹیلی کام ایڈوانس ٹیکس کو 15 فیصد سے کم کرکے 8 فیصد کرنے کی تجویز دی اور کہا کہ قانون سازی کے ذریعے ٹیلی کام کمپنیاں کسی کی جائیداد زبردستی نہیں لے سکتیں۔
انہوں نے زراعت پر مجموعی ٹیکس کے خاتمے، یونیورسٹی فیکلٹی کے لئے ٹیکس چھوٹ کی بحالی، وفاقی ملازمین اور پنشنرز کے میڈیکل الاؤنس کی بحالی اور سرکاری ملازمین کی تنخواہوں میں 15 فیصد اضافے کا مطالبہ کیا۔
عامر ڈوگر نے مزید کہا کہ کراچی حیدرآباد موٹر وے کے فنڈز میں اضافہ اور ایران پاکستان گیس پائپ لائن کی تکمیل کی جانی چاہئے۔
شہباز شریف نے اعلان کیا کہ پیٹرول کی قیمت میں 74 روپے اور ڈیزل کی قیمت میں 67 روپے کمی کی جا رہی ہے جبکہ پیٹرول اور ڈیزل پر لیوی اوسطاً 80 روپے سے کم پر آگئی ہے۔
