نئی دہلی (لارڈ میڈیا): بھارت کی ٹی ٹوئنٹی کرکٹ ٹیم کی کپتانی میں ممکنہ تبدیلی کی خبریں گردش کر رہی ہیں۔ آئندہ آئرلینڈ اور انگلینڈ کے خلاف سیریز میں شریاس ائیر کو کپتانی دی جا سکتی ہے۔ اس سے قبل سوریا کمار یادیو نے مارچ میں بھارت کو ٹی ٹوئنٹی ورلڈ کپ جتوایا تھا۔
بھارتی میڈیا کے مطابق سوریا کمار کی کپتانی کے بارے میں حتمی فیصلہ ہیڈ کوچ گوتم گمبھیر سے مشاورت کے بعد کیا جائے گا، تاہم موجودہ صورتحال میں ان کی کپتانی کے جاری رہنے کے امکانات کم ہیں۔
سلیکٹرز طویل المدتی حکمت عملی پر غور کر رہے ہیں کہ نیا کپتان آئندہ دو ورلڈ کپ تک قیادت کرے۔ سوریا کمار کی ناقص بیٹنگ فارم، خاص کر آئی پی ایل 2026 میں، ان کے لیے مسئلہ بنی رہی۔
کپتانی کے امیدواروں میں شریاس ائیر کا نام آگے ہے جبکہ تلک ورما اور ایشان کشن بھی ممکنہ امیدوار ہیں۔ اگر شریاس کو کپتانی سونپی جاتی ہے تو ان میں سے کوئی نائب کپتان بن سکتا ہے۔
نوجوان کھلاڑی ویبھَو سوریاونشی کی حالیہ کارکردگی بھی سلیکٹرز کی توجہ کا مرکز بنی ہوئی ہے اور انہیں آئندہ سیریز میں موقع مل سکتا ہے۔
