لاہور (لارڈ میڈیا): لاہور ہائیکورٹ نے خاتون کو زیادتی کے بعد قتل کرنے والے مجرم احمد کی سزائے موت کے خلاف اپیل مسترد کردی اور ٹرائل کورٹ کا فیصلہ برقرار رکھا۔ جسٹس فاروق حیدر اور جسٹس علی ضیاء باجوہ پر مشتمل بینچ نے کہا کہ مجرم کو عبرتناک سزا کا مستحق قرار دیا گیا ہے۔
عدالت نے کہا کہ مجرم کے خلاف ٹھوس شواہد موجود ہیں اور استغاثہ نے اپنے الزامات ثابت کیے ہیں۔ 2021 میں تھانہ فیکٹری ایریا شیخوپورہ میں مقدمہ درج ہوا تھا اور 2023 میں ٹرائل کورٹ نے اسے سزائے موت سنائی تھی۔
پراسیکیوشن کے مطابق، مجرم نے متاثرہ خاتون کو نہر کے قریب لے جا کر زیادتی کا نشانہ بنایا اور پھر پٹرول چھڑک کر آگ لگا دی۔ خاتون نے شدید زخمی حالت میں ہسپتال میں ملزم کے خلاف بیان دیا تھا۔
پولیس نے تفتیش کے دوران مجرم سے متعلقہ اشیاء برآمد کیں، جنہوں نے استغاثہ کے مؤقف کو مضبوط بنایا۔ عدالت نے تمام شواہد کا جائزہ لینے کے بعد مجرم کی سزا برقرار رکھنے کا حکم دیا۔
