واشنگٹن (شِنہوا) وال سٹریٹ جرنل نے امریکی حکام کے حوالے سے بتایا ہے کہ امریکی فوج آنے والے دنوں میں بین الاقوامی پانیوں میں ایران سے منسلک آئل ٹینکرز پر چڑھائی کرنے اور تجارتی جہازوں کو ضبط کرنے کی تیاری کر رہی ہے۔
چیئرمین جوائنٹ چیفس آف سٹاف ڈین کین نے کہا ہے کہ امریکہ کسی بھی ایرانی پرچم بردار جہاز یا ایران کو مادی مدد فراہم کرنے کی کوشش کرنے والے کسی بھی جہاز کا بھرپور تعاقب کرے گا۔
رپورٹ کے مطابق اس اقدام سے امریکہ کو دنیا بھر میں ایران سے منسلک جہازوں کا کنٹرول حاصل کرنے میں مدد ملے گی، جن میں وہ جہاز بھی شامل ہیں جو ایرانی تیل لے جا رہے ہیں اور پہلے ہی خلیج فارس سے باہر سفر کر رہے ہیں۔ اس کے علاوہ وہ جہاز جو تہران کی مدد کے لئے اسلحہ لے جا رہے ہیں۔
کین کے مطابق اس آپریشن کا کچھ حصہ امریکی ہند-بحرالکاہل کمان انجام دے گی۔
یہ اقدام تہران کے خلاف امریکی دباؤ مہم کے ایک نئے مرحلے کی نشاندہی کرتا ہے، جسے شدید معاشی دباؤ "اکنامک فیوری” کہا جاتا ہے۔ اس کا مقصد مشرق وسطیٰ کے اس ملک پر زیادہ سے زیادہ معاشی دباؤ ڈالنا ہے جبکہ دونوں ممالک کے درمیان عارضی جنگ بندی اگلے ہفتے ختم ہونے والی ہے۔
وائٹ ہاؤس کی ترجمان اینا کیلی کے مطابق امریکی صدر ڈونلڈ ٹرمپ اس بات کے بارے میں پرامید ہیں کہ بحری ناکہ بندی اور اکنامک فیوری کے تحت عائد اقدامات امن معاہدے کو ممکن بنانے میں مدد دیں گے۔
