اولان باتور (شِنہوا) صحرائی پھیلاؤ کی روک تھام کے متعلق اقوام متحدہ کنونشن (یو این سی سی ڈی)کے فریقین کی 17 ویں کانفرنس (کوپ 17) کا پیر کے روز منگولیا کے دارالحکومت اولان باتور میں باضابطہ آغاز ہوگیا ہے۔
’’زمین کی بحالی، امید کی بحالی‘‘ کے موضوع کے تحت منعقد ہونے والی کوپ 17 میں یو این سی سی ڈی کے 197 فریقوں کے 12 ہزار نمائندے شرکت کر رہے ہیں۔ عالمی سطح کا یہ اہم فورم صحرائی پھیلاؤ، زمین کی تنزلی اور خشک سالی سے نمٹنے کے لئے اقدامات کو تیز کرنے کے مقصد سے منعقد کیا جا رہا ہے۔
منگولیا کے وزیراعظم نیام اوسر اوچھرل نے افتتاحی تقریب سے خطاب کرتے ہوئے کہا ہے کہ دنیا اس حوالے سے اجتماعی فیصلہ سازی کے ایک نئے دور میں داخل ہو رہی ہے کہ کرہ ارض کے زمینی وسائل کا تحفظ اور بحالی کیسے کی جائے اور آنے والی نسلوں کے لئے کس طرح کی دنیا چھوڑی جائے۔
اوچھرل نے کہا کہ "اب بڑے پیمانے پر یہ تسلیم کیا جا چکا ہے کہ صحرائی پھیلاؤ، زمین کی تنزلی اور خشک سالی ایسے چیلنجز ہیں جو قومی سرحدوں سے بالاتر ہیں اور انسانیت کی جانب سے اجتماعی ردعمل کا تقاضا کرتے ہیں۔”
انہوں نے کہا کہ "ہمیں اب مزید کوششیں کرنے کی ضرورت ہے تاکہ صحرائی پھیلاؤ اور زمین کی تنزلی سے نمٹنے کے عزم کو مناسب مالی معاونت، ٹیکنالوجی اور ادارہ جاتی ڈھانچے کی مدد سے عملی اقدامات میں تبدیل کیا جا سکے۔ لہٰذا کوپ17ایسی کانفرنس نہیں ہونی چاہیے جو گزشتہ اجلاسوں کے فیصلوں اور اعلانات کو محض دہراتی رہے بلکہ اسے ان فیصلوں پر عملدرآمد تیز کرنے والی کانفرنس ہونا چاہیے۔”
کوپ 17 کے اعلیٰ سطح اجلاس میں وزارتی سطح کے مذاکرات ہوں گے، جبکہ وسیع تر پروگرام میں مختلف فریقوں پر مشتمل فورمز اور سائنس اور پالیسی کے انضمام، اختراع اور حل، آلات و ٹیکنالوجیز اور مالی معاونت سے متعلق موضوعاتی مباحث شامل ہوں گے۔پروگرام میں 4 موضوعاتی دن بھی شامل ہیں، جن میں مالی معاونت، پانی، زمین اور عوام اور غذائی نظام و مٹی کی صحت پر توجہ مرکوز کی جائے گی۔
یہ کانفرنس اقوام متحدہ کی جانب سے 2026 کو چراگاہوں اور چرواہوں کا بین الاقوامی سال (آئی وائی آر پی 2026) قرار دیئے جانے کے موقع پر بھی منعقد ہو رہی ہے، جس کی منگولیا نے بھرپورحمایت کی ہے۔یہ سال قدرتی چراگاہوں کے پائیدار انتظام، بحالی اور تحفظ کو فروغ دینے اور ان چرواہا برادریوں کی ضروریات کو اجاگر کرنے کا ایک اہم موقع فراہم کرتا ہے، جن کا ذریعہ معاش براہ راست ان ماحولیاتی نظاموں پر منحصر ہے۔
