اسلام آباد (لارڈ میڈیا): نیشنل سائبر کرائم انویسٹی گیشن ایجنسی (این سی سی آئی اے) نے آن لائن استخارہ اور تعویذ دینے کے بہانے خواتین کو بلیک میل کرنے والے ملزم کو گرفتار کر لیا ہے۔ این سی سی آئی اے کے ترجمان کے مطابق ملزم معصوم خواتین کو مختلف تعویذ اور وظائف کے نام پر اپنے جال میں پھنساتا تھا۔
تفتیش کے دوران معلوم ہوا کہ ملزم خواتین کا اعتماد حاصل کر کے انہیں بلیک میل کرتا تھا۔ مزید برآں، ملزم نے دھوکہ دہی سے نازیبا تصاویر اور نجی ویڈیوز حاصل کر کے متاثرہ خواتین سے بھاری رقوم وصول کیں۔
ترجمان نے بتایا کہ ملزم کا موبائل فون قبضے میں لے کر فرانزک معائنے کے لیے بھیج دیا گیا ہے تاکہ مزید شواہد جمع کیے جا سکیں۔ ملزم کے خلاف پریوینشن آف الیکٹرانک کرائمز ایکٹ (پیکا) کے تحت مقدمہ درج کر لیا گیا ہے اور اس کے ساتھیوں کی گرفتاری کے لیے بھی کوششیں جاری ہیں۔
این سی سی آئی اے کے مطابق معاملے کی تفتیش تیزی سے جاری ہے اور مزید گرفتاریاں بھی ممکن ہیں۔ ایجنسی کی یہ رواں ہفتے کی دوسری کارروائی ہے جس میں خواتین کو آن لائن ہراساں کرنے کے الزامات پر ملزموں کو گرفتار کیا گیا۔ تین روز قبل لاہور، ملتان اور فیصل آباد میں بھی کارروائیاں کی گئیں جن میں موبائل فونز اور دیگر ڈیجیٹل شواہد برآمد کیے گئے۔
