تیانجن (شِنہوا) ڈنمارک کی معروف دوا ساز کمپنی نووو نورڈسک نے اعلان کیا ہے کہ وہ چین کی شمالی تیانجن بلدیہ میں واقع اپنے پیداواری مرکز میں مزید 20 کروڑ یوآن (تقریباً 2 کروڑ 94 لاکھ امریکی ڈالر) کی سرمایہ کاری کرے گی۔ اس سرمایہ کاری کے ذریعے ادویات کی پیداوار میں توسیع اور انجکشن لگانے والے متعلقہ آلات کی تیاری اور پیداواری صلاحیت میں اضافہ کیا جائے گا۔
کمپنی کے مطابق توسیعی منصوبے کی تکمیل کے بعد متعلقہ مصنوعات کی پیداواری استعداد اور ترسیل کی کارکردگی مزید بہتر ہوگی جس سے چینی منڈی میں ادویات کی بڑھتی ہوئی اور متنوع ضروریات کو بہتر انداز میں پورا کیا جا سکے گا۔
تیانجن اقتصادی-ٹیکنالوجی ترقیاتی علاقہ میں واقع نووو نورڈسک کا تیانجن پیداواری مرکز کمپنی کے عالمی سطح پر قائم تزویراتی پیداواری مراکز میں سے ایک ہے جہاں سے انجکشن لگانے والے آلات اور ادویات کی تیار شدہ مصنوعات چین سمیت دیگر منڈیوں کو فراہم کی جاتی ہیں۔
نووو نورڈسک میں عالمی پیداوار اور ترسیل کے ایگزیکٹو نائب صدر کاسپر بوڈکر میجلوانگ نے کہا کہ تیانجن کارخانہ کمپنی کے عالمی ترسیلی نظام کا ایک اہم ستون ہے اور یہ مقامی سطح پر جدید اور اختراعی مصنوعات کی تیاری جاری رکھے گا۔ انہوں نے کہا کہ یہ سرمایہ کاری چین میں کمپنی کی موجودگی کو مزید مضبوط بنانے اور طویل المدتی ترقی کے عزم کی عکاس بھی ہے۔
1923 میں قائم ہونے والی اور ڈنمارک میں صدر دفتر رکھنے والی نووو نورڈسک دنیا کی صف اول کی حیاتیاتی ادویہ ساز کمپنیوں میں شمار ہوتی ہے۔ کمپنی نے 1994 میں چینی منڈی میں قدم رکھا تھا۔ 2003 سے اب تک نووو نورڈسک کی چین میں مجموعی سرمایہ کاری 17 ارب یوآن سے تجاوز کر چکی ہے۔
