چین میں الیکٹرک گاڑیوں کی چارجنگ اور ڈیٹا سروس کے شعبوں میں بجلی کے استعمال میں اضافہ

بیجنگ (شِنہوا) چین میں جولائی کے دوران الیکٹرک گاڑیوں کی چارجنگ اور انٹرنیٹ ڈیٹا سروسز کے شعبوں میں بجلی کے استعمال میں زبردست اضافہ ہوا، جو ملک کی تیزی سے ترقی کرتی نئی توانائی کی گاڑیوں اور ڈیجیٹل صنعتوں کی مضبوط طلب کی عکاسی کرتا ہے۔

قومی توانائی انتظامیہ کے مطابق جولائی میں چارجنگ اور بیٹری تبدیل کرنے کی خدمات کے لئے بجلی کا استعمال 16.4 ارب کلو واٹ آور تک پہنچ گیا، جو گزشتہ سال کی نسبت 50.3 فیصد زائد ہے، جبکہ انٹرنیٹ ڈیٹا سروسز کے لئے بجلی کا استعمال 40.1 فیصد بڑھ کر 9.9 ارب کلو واٹ آور ہو گیا۔

چین میں جولائی کے دوران بجلی کی مجموعی کھپت 10.4کھرب کلو واٹ آور رہی جو گزشتہ سال کی نسبت 1.7 فیصد زائد ہے۔

اعداد و شمار کے مزید جائزے سے ظاہر ہوتا ہے کہ جولائی میں بنیادی صنعت میں بجلی کی کھپت 16.7 ارب کلو واٹ آور رہی جو گزشتہ سال کی نسبت 2 فیصد کم ہے۔ خدمات کے شعبے میں بجلی کا استعمال 4.8 فیصد اضافے کے ساتھ 218.3 ارب کلو واٹ آور جبکہ ثانوی صنعت میں بجلی کی کھپت 3 فیصد اضافے کے ساتھ گزشتہ ماہ 611.6 ارب کلو واٹ آور رہی۔

خاص طور پر ہائی- ٹیک اور آلات سازی کی صنعتوں میں بجلی کی کھپت گزشتہ سال کی نسبت 8.9 فیصد بڑھ کر جولائی میں 122 ارب کلو واٹ آور تک پہنچ گئی۔

بجلی کی کھپت کو بڑے پیمانے پر معاشی سرگرمیوں کا ایک پیمانہ سمجھا جاتا ہے، جبکہ بجلی کی طلب میں اتار چڑھاؤ صنعتی ڈھانچے اور ترقی کے محرکات میں تبدیلیوں کے بارے میں اہم اشارے فراہم کرتا ہے۔