ریاض (لارڈ میڈیا): ترکیہ کے صدر رجب طیب اردوان آج سعودی عرب کا ایک روزہ دورہ کریں گے جہاں ان کی وزیراعظم شہباز شریف اور سعودی ولی عہد شہزادہ محمد بن سلمان سے ملاقات متوقع ہے۔ ترکیہ کے صدارتی محکمہ اطلاعات کے ڈائریکٹر برہان الدین دوران نے اس دورے کی تصدیق کی ہے۔
صدر اردوان سعودی قیادت سے اہم علاقائی اور دوطرفہ امور پر تبادلہ خیال کریں گے اور ان کی سعودی ولی عہد سے ملاقات کو خاص اہمیت دی جا رہی ہے۔
صدر اردوان کی وزیراعظم شہباز شریف سے بھی ملاقات متوقع ہے جس میں پاکستان اور ترکیہ کے باہمی تعلقات اور خطے کی موجودہ صورتحال پر بات چیت کا امکان ہے۔
ترکیہ، پاکستان اور سعودی عرب کے درمیان حالیہ عرصے میں علاقائی امن اور سفارتی رابطوں میں اضافہ ہوا ہے۔ تجزیہ کاروں کے مطابق اردوان کے دورۂ سعودی عرب کے دوران ایران اور امریکا کے درمیان کشیدگی اور خطے میں تجارتی و بحری آمدورفت جیسے معاملات بھی زیر بحث آ سکتے ہیں۔
سعودی عرب مشرق وسطیٰ کی موجودہ صورتحال میں اہم علاقائی طاقت کے طور پر سفارتی کردار ادا کر رہا ہے جبکہ ترکیہ بھی علاقائی تنازعات کے حل کے لیے سفارتی رابطے جاری رکھے ہوئے ہے۔ ماہرین کے مطابق اردوان کی ملاقاتیں خطے میں آئندہ سفارتی حکمت عملی کے حوالے سے اہم اشارے فراہم کر سکتی ہیں۔
