کراچی (لارڈ میڈیا): ملک بھر میں 29 جولائی سے 5 اگست تک مون سون بارشوں کا نیا سلسلہ شروع ہونے کا امکان ہے۔ محکمہ موسمیات کے مطابق بحیرہ عرب اور خلیج بنگال سے مون سون ہوائیں ملک میں داخل ہوں گی جبکہ مغربی ہواؤں کا سلسلہ شمالی علاقوں کو متاثر کر رہا ہے۔
محکمہ موسمیات نے کہا ہے کہ 29 جولائی سے کشمیر، اسلام آباد، راولپنڈی، مری، لاہور اور دیگر علاقوں میں بارش کا امکان ہے۔ 31 جولائی سے بہاولپور، بہاولنگر، خانپور، ڈی آئی خان اور دیگر علاقوں میں بارش متوقع ہے۔
موسمیاتی تبدیلیوں کے باعث فلیش فلڈ، لینڈ سلائیڈنگ اور اربن فلڈنگ کے خطرات بڑھ رہے ہیں، احسن اقبال نے کہا ہے۔ علاوہ ازیں خیبرپختونخوا میں 29 جولائی سے 5 اگست تک بارش ہو سکتی ہے جبکہ گلگت بلتستان میں 28 جولائی کی شام سے 6 اگست تک بارش متوقع ہے۔
محکمہ موسمیات کے مطابق 31 جولائی سے 2 اگست تک سندھ کے مختلف اضلاع میں بارش ہو سکتی ہے، بدین، ٹھٹہ، کراچی اور سجاول میں گرج چمک کے ساتھ بارش کا امکان ہے۔ بارشوں کے باعث ندی نالوں میں طغیانی اور نشیبی علاقوں میں اربن فلڈنگ کا خدشہ ہے۔
ماہرین کا کہنا ہے کہ ہوا کا کم دباؤ خلیج بنگال میں جمع ہے جس کے باعث کراچی میں بھی بارش ہو سکتی ہے۔ مختلف بین الاقوامی موسمیاتی ماڈلز سسٹم کے تین مختلف ٹریکس دکھا رہے ہیں، جن میں سے ایک کے تحت یہ سسٹم راجستھان کے قریب پہنچ سکتا ہے۔
