شہر (لارڈ میڈیا): ایک نئی تحقیق میں انکشاف ہوا ہے کہ باقاعدگی سے فرینچ فرائز کھانے سے ٹائپ 2 ذیابیطس کا خطرہ بڑھ جاتا ہے، جبکہ دیگر طریقوں سے پکائے گئے آلو میں یہ خطرہ نہیں پایا گیا۔ تحقیق کے مطابق، ہفتے میں تین بار فرینچ فرائز کھانے سے ذیابیطس کا خطرہ بیس فیصد تک بڑھ سکتا ہے۔
تحقیق دی بی ایم جے میں شائع ہوئی، جس میں 1984 سے 2021 تک 205,000 افراد کی غذائی عادات کا جائزہ لیا گیا۔ تحقیق کے دوران 22,000 سے زائد افراد میں ٹائپ 2 ذیابیطس کی تشخیص ہوئی۔
ماہرین نے بتایا کہ گرم تیل میں آلو کو فرائی کرنے سے غیر صحت بخش چکنائی شامل ہو جاتی ہے جو انسولین کے نظام کو متاثر کرتی ہے۔ اس کے برعکس، ابلے یا بیک کیے گئے آلو کھانے سے خطرہ نہیں بڑھتا۔
تحقیق میں یہ بھی بتایا گیا کہ فرینچ فرائز کی جگہ سالم اناج کی غذائیں، جیسے دلیہ، استعمال کرنے سے شوگر کا خطرہ انیس فیصد تک کم ہو سکتا ہے۔
ماہرین کا مشورہ ہے کہ بازار کی فرینچ فرائز سے پرہیز کریں اور آلو کو ابال کر یا بیک کر کے کھائیں تاکہ صحت مند رہ سکیں۔
