کراچی (لارڈ میڈیا): مختصر دورانیے کی ویڈیوز جیسے انسٹاگرام ریلز اور یوٹیوب شارٹس کا بڑھتا ہوا رجحان آنکھوں اور دماغ کے لئے خطرناک ثابت ہو رہا ہے۔ ماہرین کا کہنا ہے کہ موبائل فون کی چھوٹی اسکرین پر مسلسل ویڈیوز دیکھنے سے آنکھوں پر دباؤ بڑھتا ہے اور دماغ کی توجہ مرکوز کرنے کی صلاحیت متاثر ہوتی ہے۔
ماہرین کے مطابق ان ویڈیوز میں تیز رفتار تصاویر اور چمکدار رنگ آنکھوں کو مسلسل متحرک رکھتے ہیں جس سے آنکھوں کی تھکن اور ذہنی دباؤ بڑھتا ہے۔ مزید یہ کہ یہ عادت بصری بے صبری کو بڑھا سکتی ہے، جس سے کتاب پڑھنا یا پڑھائی کرنا بورنگ لگ سکتا ہے۔
آنکھوں کو محفوظ رکھنے کے لئے ماہرین نے 20-20-20 اصول اپنانے کی تجویز دی ہے جس کے مطابق ہر 20 منٹ بعد 20 سیکنڈ کا وقفہ لے کر 20 فٹ دور دیکھنا چاہئے۔ اس کے علاوہ موبائل یا لیپ ٹاپ استعمال کرتے وقت درست نشست اور شعوری طور پر پلکیں جھپکانا مفید ثابت ہو سکتا ہے۔
ماہرین نے یہ بھی مشورہ دیا کہ رات کو سونے سے ایک گھنٹہ قبل فون کا استعمال بند کر دینا چاہئے اور آڈیو مواد یا پوڈ کاسٹ سننے کی عادت اپنانی چاہئے تاکہ آنکھوں کو آرام مل سکے۔
