تحریک تحفظ آئین پاکستان کے سربراہ محمود اچکزئی نے کہا ہے کہ ہم کسی کو فتح یا گالیاں دینے نہیں، آئین بچانے، ظلم کے خاتمے کیلئے نکلے ہیں، عوام ملک میں آئین کی حکمرانی اور امن کیلئے ساتھ دیں۔
ذرائع کے مطابق جمعرات کو تحریک تحفظ آئین پاکستان کا 70 گاڑیوں پر مشتمل قافلہ تین روزہ دورے پر اسلام آباد سے لاہور کیلئے روانہ ہوگیا۔
قافلے میں سینئر نائب صدر علامہ راجہ ناصر عباس، نائب صدر مصطفی نواز کھوکھر، سیکرٹری جنرل اسد قیصر، اپوزیشن لیڈر پنجاب اسمبلی معین ریاض قریشی سمیت دیگر اپوزیشن ارکان پنجاب اسمبلی شامل ہیں۔
روانگی سے قبل میڈیا سے گفتگو کرتے ہوئے محمود اچکزئی نے کہا کہ وہ نہ کسی کو فتح کرنے، نہ گالیاں دینے اور نہ ہی پتھر مارنے نکلے ہیں بلکہ آئین بچانے اور ظلم کے خاتمے کیلئے نکلے ہیں۔
انہوں نے عوام سے اپیل کی کہ جو بھی پاکستان میں آئین کی حکمرانی اور امن چاہتا ہے وہ اس تحریک کا ساتھ دے۔
انہوں نے کہا کہ ملک ناکامیوں کی طرف جا رہا ہے، ہمسایہ ممالک سے تعلقات خراب ہو رہے ہیں ،حکومت خود جانتی ہے کہ وہ ہار چکی ہے۔
اس موقع پر فوکل پرسن پنجاب بریگیڈیئر (ر)مشتاق نے کہا کہ تحریک تحفظ آئین پاکستان کی بڑھتی سرگرمیوں کے باعث صوبائی حکومت بوکھلاہٹ کا شکار ہے، مختلف شہروں میں تحریک انصاف کے کارکنوں کے خلاف کریک ڈائون کیا جا رہا ہے۔
انہوں نے کہا کہ گوجر خان میں قافلے کے استقبال کیلئے آنے والے کارکنوں پر پولیس نے کریک ڈائون کیا گیا۔
انہوں نے کہا کہ یہ دورہ پنجاب میں عوامی رابطہ مہم کا اہم حصہ ہے، اس دوران آئین کی بالادستی اور جمہوری حقوق کیلئے آواز بلند کی جائے گی۔
واضح رہے کہ تحریک کے رہنماء لاہور میں سیاسی و سماجی شخصیات سے ملاقاتیں کریں گے ۔
