تہران (لارڈ میڈیا): امریکا اور ایران کے درمیان بڑھتی کشیدگی کے پانچویں روز امریکی حملوں میں جنوبی ایران میں 30 سے زائد عام شہری جاں بحق اور 260 سے زائد افراد زخمی ہو گئے ہیں۔ ایرانی حکومت کی ترجمان فاطمہ مہاجرانی نے سوشل میڈیا پر بیان جاری کرتے ہوئے اس نقصان کی تصدیق کی ہے اور سوگوار خاندانوں سے تعزیت کا اظہار کیا ہے۔
ایرانی فوج نے تصدیق کی ہے کہ جنوب مشرقی ایران کے ایران شہر کے بمپور گیریژن پر امریکی میزائل حملوں میں سات فوجی جاں بحق ہوئے ہیں۔ فوج نے اس حملے کو بزدلانہ جارحیت قرار دیتے ہوئے کہا ہے کہ اس کا فیصلہ کن جواب دیا جائے گا۔
ایرانی نیوز ایجنسی کے مطابق، امریکی فوج نے تیرہ میزائلوں کے ذریعے بمپور پر حملہ کیا، جس سے 388 ویں بریگیڈ کے سات اہلکار جاں بحق اور متعدد زخمی ہو گئے۔ ایرانی فوج کے مطابق ان کے دفاعی اقدامات نے جانی نقصان کو ایک حد تک روکا ہے۔
ایران کی وزارت صحت کے ترجمان حسین کرمانپور نے بتایا کہ حالیہ امریکی حملوں میں 260 سے زائد افراد زخمی ہوئے ہیں، جن میں 222 افراد کو طبی امداد کے بعد فارغ کر دیا گیا ہے۔ زخمیوں میں تین بچے بھی شامل ہیں جن کی عمریں 18 سال سے کم ہیں۔
واضح رہے کہ امریکی افواج نے ایران کی بندرگاہوں پر بحری ناکہ بندی نافذ کر دی ہے اور درجنوں ایرانی اہداف کو نشانہ بنایا ہے، جس کے بعد دونوں ممالک کے درمیان پانچویں دن بھی لڑائی جاری ہے۔
