انڈیانا پولس (لارڈ میڈیا): سکھ فار جسٹس کے زیر اہتمام انڈیانا پولس میں خالصتان کے قیام کے حق میں ریفرنڈم منعقد ہوا جس میں سکھ برادری کی بڑی تعداد نے شرکت کی۔
بارش کے باوجود ووٹنگ کا عمل جاری رہا اور خواتین و بچوں سمیت بڑی تعداد میں لوگ پولنگ کے لیے موجود رہے۔ منتظمین کے مطابق ووٹنگ شام 6 بجے تک جاری رہی جس کے بعد ڈالے گئے ووٹوں کی تعداد کا اعلان متوقع ہے۔
تقریب کے دوران خالصتان اور کشمیر کی آزادی کے حق میں نعرے لگائے گئے۔ فرینڈز آف کشمیر کی چیئرپرسن غزالہ حبیب نے بھی اس موقع پر خطاب کیا اور کشمیر کی آزادی کا مطالبہ کیا۔
خالصتان ریفرنڈم مہم کے وکرم جیت سنگھ نے کہا کہ ریفرنڈم 2020 میں شروع ہوا، مگر کورونا کے باعث متاثر ہوا۔ ان کے مطابق اب تک دنیا بھر میں 20 لاکھ سکھ اس میں ووٹ ڈال چکے ہیں۔
وکرم جیت سنگھ نے بھارتی حکومت پر سکھوں کے ساتھ ناانصافیوں کے الزامات عائد کیے اور بھارت کی وفاقی ساخت کے خاتمے کی حمایت کی۔ انہوں نے کہا کہ سکھ برادری جمہوری طریقے سے اپنے حقوق کے لیے لڑ رہی ہے۔
منتظمین نے کہا کہ انڈیانا پولس میں ووٹنگ کے بعد نتائج کا اعلان ہوگا اور آئندہ مرحلہ 18 اکتوبر کو کینیڈا میں ہوگا۔ تاہم کینیڈا کے شہر کا نام ابھی واضح نہیں کیا گیا۔
