اسلام آباد (لارڈ میڈیا): آزاد کشمیر کے سیاسی رہنماؤں نے پاکستان کے ساتھ کشمیری عوام کے تاریخی اور نظریاتی رشتے کو کمزور کرنے کی کوششوں کو ناکام بنانے کا عزم ظاہر کیا ہے۔ انہوں نے اسلام آباد میں مشترکہ پریس کانفرنس کرتے ہوئے پاکستان مخالف سرگرمیوں، حالیہ احتجاجی واقعات اور کالعدم جوائنٹ ایکشن کمیٹی پر شدید تنقید کی ہے۔
سابق وزیراعظم سردار عتیق اور شاہ غلام قادر نے کہا کہ کشمیر کے معاملے پر کوئی سمجھوتہ نہیں ہوگا۔ شاہ غلام قادر نے بھارت کے ایجنڈے کو ناکام بنانے کا عزم ظاہر کیا اور کالعدم ایکشن کمیٹی پر انتشار پھیلانے کا الزام لگایا۔
سردار عتیق احمد خان نے کہا کہ مطالبات کے باوجود تحریک کو آئینی تنازعے کی طرف موڑا گیا اور چکسواری، پلندری اور دیگر علاقوں میں اربوں روپے کی املاک کو نقصان پہنچا۔ احتجاج کے دوران ہونے والے جرائم کے 170 سے زائد مقدمات درج ہیں۔
خاتون رہنما نبیلہ ایوب نے کہا کہ پاکستان اور افواج پاکستان کا کردار آزاد کشمیر کے امن و استحکام کی ضمانت ہے۔ انہوں نے کہا کہ عوامی حقوق کے لیے جدوجہد ہر شہری کا آئینی حق ہے، لیکن انتشار اور تشدد ناقابل قبول ہیں۔
وزیر اطلاعات عطا تارڑ نے کہا کہ کالعدم جوائنٹ ایکشن کمیٹی کا چہرہ دنیا کے سامنے آ چکا ہے اور اس گروہ کا مقصد امن خراب کرنا ہے۔ انہوں نے مظاہرین کو گھروں کو واپس جانے کی تلقین کی۔
