اسلام آباد: وزیراعظم محمد شہباز شریف اور چیف آف آرمی اسٹاف و چیف آف ڈیفنس اسٹاف فیلڈ مارشل سید عاصم منیر اسلام آباد مفاہمتی یادداشت (ایم او یو) کے تحت جاری سفارتی عمل کو آگے بڑھانے کے لیے آج اتوار کو سوئٹزرلینڈ کے مقام برگن اسٹاک میں ہونے والے تکنیکی سطح کے مذاکرات میں شرکت کریں گے۔
وزیراعظم آفس کی جانب سے اتوار کی علی الصبح جاری کردہ ایک بیان کے مطابق یہ مذاکرات اسلام آباد مفاہمتی یادداشت پر دستخط کے بعد ہونے والی پیش رفت کا حصہ ہیں اور ان کا مقصد مختلف امور پر تفصیلی بات چیت کو آگے بڑھانا ہے۔
بیان میں کہا گیا کہ وزیراعظم شہباز شریف ایک اعلیٰ سطحی وفد کے ہمراہ اسلام آباد سے سوئٹزرلینڈ روانہ ہو گئے ہیں تاکہ مذاکرات میں پاکستان کی نمائندگی کر سکیں۔
وزیراعظم آفس کے مطابق فیلڈ مارشل سید عاصم منیر بھی ان اہم مذاکرات میں شریک ہوں گے، جو اتوار کو برگن اسٹاک میں منعقد ہوں گے۔
بیان میں مذاکرات کے ایجنڈے یا زیرِ غور امور کے بارے میں مزید تفصیلات فراہم نہیں کی گئیں، تاہم مبصرین کے مطابق یہ ملاقات اسلام آباد مفاہمتی یادداشت کے تحت جاری سفارتی عمل میں ایک اہم پیش رفت تصور کی جا رہی ہے۔
