حیدرآباد (لارڈ میڈیا): نامپلی عدالت نے فلم ‘پشپا ٹو’ کے دوران بھگدڑ کے کیس میں اداکار الو ارجن کو 22 جون کو عدالت میں پیش ہونے کا حکم دیا ہے۔ پولیس نے اس واقعے میں الو ارجن کو گیارہویں نمبر پر ملزم نامزد کیا ہے، جبکہ سینما گھر کی انتظامیہ کو پہلے دس نمبروں پر ملزم بنایا گیا ہے۔ اب تک تئیس لوگوں کے خلاف چارج شیٹ داخل کی جا چکی ہے۔
یہ واقعہ 4 دسمبر 2024 کو ساندھیا تھیٹر میں پیش آیا جب بھگدڑ سے ریوتھی نامی خاتون جاں بحق ہو گئیں اور ان کے بیٹے سریتیج شدید زخمی ہو گئے۔ الو ارجن کی قانونی ٹیم نے تصدیق کی ہے کہ انہیں عدالت میں پیش ہونے کا حکم دیا گیا ہے۔
الو ارجن کے اہل خانہ نے متاثرہ خاندان کی مدد کی پیشکش کی ہے۔ الو اراوند اور سنیہا ریڈی نے سریتیج کے اہل خانہ سے ملاقات کی اور ان کی مدد کی یقین دہانی کرائی۔ الو اراوند نے سریتیج کی بہن کی تعلیم کے اخراجات اٹھانے کا وعدہ کیا ہے۔
سریتیج کی حالت اب بھی نازک ہے اور انہیں مختلف تھراپیز کے ذریعے علاج کیا جا رہا ہے۔ پانچ مہینے ہسپتال میں گزارنے کے بعد انہیں گھر منتقل کیا گیا، جہاں ان کا علاج جاری ہے۔ والد موگاڈمپلی بھاسکر نے کہا کہ ان کے بیٹے کی حالت میں بہتری آ رہی ہے۔
