بشکیک (شِنہوا) کرغزستان نے اپنے شہریوں کے لئے چین کی جانب سے ویزا شرائط آسان بنانے کے فیصلے کا خیرمقدم کیا ہے۔
جمہوریہ کرغزستان کی صدارتی انتظامیہ کے شعبہ خارجہ پالیسی کے سربراہ ساگین بیک عبدالمطلب نے ایک بیان میں کہا کہ انہیں یقین ہے کہ یہ اقدام تجارت اور سیاحت کے شعبوں میں تعاون کو فروغ دینے کے لئے سازگار حالات پیدا کرے گا۔
چین کی قومی امیگریشن انتظامیہ (این آئی اے) کے مطابق جمعرات سے کرغزستان اور ویتنام کے عام پاسپورٹ رکھنے والے شہری، جن کے پاس کسی تیسرے ملک یا خطے کے لئے تصدیق شدہ تاریخوں اور سفری روٹ پر مشتمل انٹر لائن مسافر ٹکٹ موجود ہوں، چین کے 65 میں سے کسی بھی بندرگاہ کے ذریعے ملک میں داخل ہو سکتے ہیں اور بغیر ویزا کے زیادہ سے زیادہ 240 گھنٹے یعنی 10 دن قیام کر سکتے ہیں۔
ان دونوں ممالک کے عام پاسپورٹ رکھنے والے شہری اسی روز سے چین کے جنوبی صوبے ہائی نان کے لئے 30 روزہ ویزا فری داخلے کی سہولت کے بھی اہل ہوں گے۔ اس کے تحت وہ ہائی نان کی کھلی بندرگاہوں کے ذریعے صوبے میں داخل ہو سکیں گے اور 30 دن تک بغیر ویزا کے قیام کر سکیں گے۔ ان اضافے کے بعد ہائی نان کی ویزا فری پالیسی میں شامل ممالک کی تعداد بڑھ کر 61 ہو گئی ہے۔
