سال 2026 کی پہلی ششماہی کے دوران تقریباً 2 کروڑ 67 لاکھ 10 ہزار سیاح ہانگ کانگ آئے۔ یہ تعداد گزشتہ برس کے اسی عرصے کے مقابلے میں 13 فیصد زیادہ ہے۔ یہ بات ہانگ کانگ ٹورازم بورڈ (ایچ کے ٹی بی) کی جانب سے جمعرات کو جاری کردہ اعداد و شمار میں بتائی گئی۔
ہانگ کانگ ٹورازم بورڈ کے اعداد و شمار کے مطابق اس عرصے کے دوران چین کے مین لینڈ سے آنے والے سیاحوں کی تعداد 16 فیصد کے سالانہ اضافے کے ساتھ 2 کروڑ 5 لاکھ 60 ہزار تک پہنچ گئی۔ دوسری جانب دنیا کے دیگر ممالک سے آنے والے سیاحوں کی تعداد 5 فیصد اضافے کے ساتھ 61 لاکھ 60 ہزار ہو گئی۔
صرف جون ہی کے مہینے میں ہانگ کانگ آنے والے سیاحوں کی تعداد تقریباً 37 لاکھ 20 ہزار ریکارڈ کی گئی جو گزشتہ برس کے اسی مہینے کے مقابلے میں 7 فیصد زیادہ ہے۔
ہانگ کانگ ٹورازم بورڈ کے مطابق رواں برس کی پہلی ششماہی کے دوران سیاحوں کی آمد میں مسلسل اضافہ دیکھنے میں آیا جبکہ دور دراز ممالک سے آنے والے سیاحوں کی مجموعی تعداد بھی مستحکم رہی۔ خصوصاً فرانس، کینیڈا، آسٹریلیا اور دیگر دور دراز ممالک سے آنے والے سیاحوں کی تعداد میں 20 فیصد یا اس سے بھی زیادہ سالانہ اضافہ ریکارڈ کیا گیا۔
ہانگ کانگ، چین سے شِنہوا نیوز ایجنسی کے نمائندوں کی رپورٹ
