کراچی (لارڈ میڈیا): سینئر اداکارہ بشریٰ انصاری نے انکشاف کیا ہے کہ انہوں نے ماضی میں شوبز کے معروف فنکاروں ماہرہ خان اور فہد مصطفیٰ کے نمبر اپنے موبائل سے ڈیلیٹ کر دیے تھے۔ بشریٰ انصاری نے ایک انٹرویو میں بتایا کہ انہوں نے مختلف مواقع پر ان دونوں فنکاروں کو پیغامات بھیجے، مگر مصروفیات کے باعث جواب نہیں ملا۔ نتیجتاً، انہوں نے سمجھا کہ شاید دونوں بہت مصروف ہیں اور رابطہ نہیں رکھنا چاہتے، لہذا انہوں نے ان کے نمبر حذف کر دیے۔
بشریٰ انصاری نے مزید بتایا کہ کچھ عرصے بعد انہیں ایک پیغام موصول ہوا جس میں لکھا تھا ‘آپا، آئی لو یو، آئی مس یو’، چونکہ نمبر محفوظ نہیں تھا، انہوں نے سمجھا کہ یہ مِشی خان کی طرف سے ہے، جبکہ یہ پیغام ماہرہ خان کی طرف سے تھا۔ یہ جان کر ماہرہ خان حیران رہ گئیں کہ بشریٰ نے ان کا نمبر حذف کر دیا تھا۔
اسی طرح ایک موقع پر فہد مصطفیٰ نے بھی رابطہ کیا مگر نمبر محفوظ نہ ہونے کی وجہ سے پہچان میں غلطی ہوگئی، جس پر وہ بھی حیران رہ گئے۔ بشریٰ انصاری نے وضاحت کی کہ ان کا کسی سے ناراضی کا کوئی ارادہ نہیں تھا بلکہ وہ دونوں کو بے حد عزت دیتی ہیں۔ انہوں نے ماہرہ خان کو باادب، عاجز اور خوش اخلاق شخصیت قرار دیا اور دونوں فنکاروں کو پاکستانی انڈسٹری کے مصروف ترین ناموں میں شمار کیا۔
