کِنشاسا (شِنہوا)چین کی طبی ماہرین کی تیسری ٹیم ایبولا کی وبا کے خلاف اقدامات میں تعاون کے لیے جمہوریہ کانگو کے دارالحکومت ِکنشاسا پہنچ گئی۔
جمہوریہ کانگو کی وزارتِ صحت کے نمائندے لوکو مالیو ماریئس نے ہوائی اڈے پر چینی ٹیم کا استقبال کیا۔
انہوں نے کہا کہ جمہوریہ کانگو میں ایبولا کی صورتحال اب بھی سنگین ہے اور وبا سے نمٹنے کی کوششوں کو خاصے دباؤ کا سامنا ہے۔ ان کے مطابق چینی ماہرین کی آمد وبا کی نگرانی، مریضوں کے علاج اور تجربہ گاہوں میں جانچ کے عمل کے لیے مضبوط معاونت فراہم کرے گی۔
انہوں نے مزید کہا کہ جمہوریہ کانگو چین کے ساتھ تعاون کو مزید مضبوط بنانے اور مشترکہ طور پر وبائی امراض سے نمٹنے کی اپنی صلاحیت بہتر بنانے کے لیے تیار ہے۔
تیسری طبی ماہرین کی ٹیم کے سربراہ یانگ شیاؤچھن نے کہا کہ ان کی ٹیم سابقہ دو ٹیموں کے کام کو آگے بڑھائے گی، عملی ضروریات کے مطابق تکنیکی معاونت جاری رکھے گی اور جمہوریہ کانگو کے صحت حکام اور متعلقہ بین الاقوامی شراکت داروں کے ساتھ تبادلوں اور تعاون کو مزید گہرا کرے گی۔
یانگ نے کہا کہ ٹیم ایبولا کی موجودہ وبا کو جلد از جلد ختم کرنے کی کوششوں میں چینی مہارت اور تجربہ فراہم کرے گی۔
