واشنگٹن (لارڈ میڈیا) ایران کے ساتھ کشیدگی کے باعث امریکہ میں خام تیل کے ذخائر تیزی سے سکڑ کر 45 سال کی کم ترین سطح پر پہنچ گئے ہیں۔ بینک آف امریکہ کے چارٹ کے مطابق، ملک میں تیل کے 43 دن کی سپلائی باقی ہے، جو جولائی 1983 کے بعد سب سے کم ہے۔ یہ صورتحال امریکی توانائی سکیورٹی کے لیے تشویش کا باعث سمجھی جا رہی ہے۔
امریکی انرجی انفارمیشن ایڈمنسٹریشن کے تازہ اعداد و شمار کے مطابق، کمرشل اور اسٹریٹیجک ذخائر مسلسل دباؤ کا شکار ہیں۔ 10 جولائی تک کمرشل خام تیل کے ذخائر تقریباً 409.7 ملین بیرل ریکارڈ کیے گئے، جو 5 سالہ اوسط سے قریباً 6 فیصد کم ہیں۔
اسی طرح 18 جولائی تک اسٹریٹیجک پیٹرولیم ریزرو گھٹ کر 316.5 ملین بیرل رہ گیا، جو اپریل 1983 کے بعد کم ترین سطح ہے۔ مجموعی طور پر امریکہ کے کل ذخائر تقریباً 730.8 ملین بیرل رہ گئے ہیں، جو چار دہائیوں کی کم ترین سطحوں میں شمار ہو رہے ہیں۔
