واشنگٹن (لارڈ میڈیا): امریکی فوج نے ایران کے خلاف مسلسل آٹھویں رات فضائی اور فوجی کارروائیاں جاری رکھتے ہوئے متعدد فوجی اہداف کو نشانہ بنانے کا دعویٰ کیا ہے۔ سینٹرل کمانڈ کے مطابق تازہ حملوں میں ایران کے ساحلی نگرانی کے نظام، فضائی دفاعی تنصیبات، بحری صلاحیتوں، میزائل اور ڈرون ذخیرہ گاہوں کو نشانہ بنایا گیا۔
سینٹ کام نے کہا ہے کہ ان کارروائیوں کا مقصد ایران کی فوجی صلاحیتوں کو کمزور کرنا اور خطے میں ممکنہ حملوں کی استعداد کو محدود کرنا ہے۔ امریکی فوج کے مطابق حملوں میں پاسدارانِ انقلاب کے ان عناصر کو بھی نشانہ بنایا گیا جن پر اردن میں تعینات امریکی فوجیوں پر حملوں کا الزام ہے۔
امریکی حکام نے دعویٰ کیا کہ کارروائیاں درست ہدفی ہتھیاروں سے کی گئیں، تاہم جانی یا مالی نقصان کی تفصیلات جاری نہیں کی گئیں۔ دوسری جانب ایران کی جانب سے فوری طور پر کوئی باضابطہ ردعمل سامنے نہیں آیا۔ آزاد ذرائع سے بھی امریکی دعوؤں کی مکمل تصدیق نہیں ہو سکی۔
یہ حملے ایسے وقت میں کیے گئے ہیں جب امریکا اور ایران کے درمیان کشیدگی بڑھ رہی ہے جس سے خطے میں فوجی کارروائیوں، جوابی حملوں اور آبنائے ہرمز کی صورتحال نے عالمی برادری کی تشویش میں اضافہ کر دیا ہے۔ دفاعی ماہرین کے مطابق اگر موجودہ کشیدگی برقرار رہی تو عالمی توانائی کی منڈیوں، بین الاقوامی تجارت اور علاقائی سلامتی پر اثرات مرتب ہو سکتے ہیں۔
