میڈرڈ (شِنہوا) چین کی خودکار ڈرائیونگ کمپنی وی رائیڈ نے اعلان کیا کہ وہ رواں سال کے آخر میں میڈرڈ میں امریکی رائیڈ ہیلنگ پلیٹ فارم اوبر اور نقل و حمل کے ہسپانوی آپریٹر ایووومو کے اشتراک سے ایک آزمائشی کمرشل روبوٹیکسی سروس شروع کرے گی۔
تینوں کمپنیوں کے مشترکہ بیان کے مطابق سروس کے آغاز کے بعد صارفین اوبر ایپ کے ذریعے براہ راست خودکار ٹیکسیاں بک کر سکیں گے۔ توقع ہے کہ یہ منصوبہ سپین میں عوام کے لئے دستیاب پہلی کمرشل روبوٹیکسی پائلٹ سروس بن جائے گا۔
ابتدائی مرحلے میں موجودہ ہسپانوی ضابطہ جاتی تقاضوں کے مطابق تربیت یافتہ حفاظتی آپریٹرز گاڑیوں کے اندر موجود رہیں گے۔ کمپنیوں کا کہنا ہے کہ وہ بتدریج مکمل طور پر بغیر ڈرائیور کے تجارتی آپریشنز کو اہم شہری علاقوں تک وسعت دینے کا ارادہ رکھتی ہیں۔
اس شراکت داری کے تحت وی رائیڈ خودکار ڈرائیونگ ٹیکنالوجی اور گاڑیوں کا پلیٹ فارم فراہم کرے گی، اوبر رائیڈ ہیلنگ پلیٹ فارم اور صارفین تک رسائی مہیا کرے گا جبکہ ہسپانوی موبلٹی گروپ موو کارز کا ذیلی ادارہ ایووومو گاڑیوں کے مقامی بیڑے کے آپریشنز اور ضابطہ جاتی تعمیل کی نگرانی کرے گا۔
وی رائیڈ کے بانی اور چیف ایگزیکٹو آفیسر ہان شو نے کہا کہ "یورپ کی تیزی سے ترقی کرنے والی شہری نقل و حرکت کی منڈیوں میں سے ایک میڈرڈ میں بغیر ڈرائیور کے روبوٹیکسی سروس کا آغاز اس بات کا مظہر ہے کہ ہم پیچیدہ حقیقی ماحول میں محفوظ انداز میں کام کرنے کی صلاحیت رکھتے ہیں۔”
ہان شو نے شِنہوا کو بتایا کہ "سپین یورپ میں ہماری پانچویں مارکیٹ ہے اور یہ پورے براعظم میں ایک قابل اعتماد روبوٹیکسی آپریٹر کے طور پر ہماری حیثیت کو مزید مضبوط بناتی ہے۔”
