جنیوا(شِنہوا) اقوامِ متحدہ کے ہائی کمشنر برائے انسانی حقوق وولکر تُرک نے فلسطینیوں کی نسل کشی پر مبنی بیانات دینے پر اسرائیل کے اعلیٰ عہدیداروں کی شدید مذمت کی ہے۔
ترک نے اقوامِ متحدہ کی انسانی حقوق کونسل کے 60 ویں اجلاس سے خطاب کرتے ہوئے کہا کہ میں فلسطینیوں کے خلاف اسرائیل کے اعلیٰ حکام کی جانب سے کھلے عام نسل کشی پر مبنی بیانات اور شرمناک حد تک غیر انسانی زبان استعمال کئے جانے پر شدید خوفزدہ ہوں۔
ترک نے غزہ میں فلسطینی شہریوں کے قتلِ عام، انسانی امداد کی فراہمی میں رکاوٹیں ڈالنے سے پیدا ہونے والے قحط اور جاری جنگی جرائم پر اسرائیل کو تنقید کا نشانہ بنایا جن کے نتیجے میں "ناقابلِ بیان تکالیف اور تباہی” ہوئی ہے۔
ترک نے متعلقہ ممالک پر زور دیا کہ وہ اسرائیل کو ایسے ہتھیاروں کی فراہمی بند کریں جو جنگی قوانین کی خلاف ورزی کا خطرہ رکھتے ہوں، جنگ بندی کے لئے دباؤ ڈالیں، یرغمالیوں اور قیدیوں کی رہائی کو یقینی بنائیں اور غزہ میں انسانی امداد کے مکمل اور موثر داخلے کو ممکن بنائیں۔
ترک نے اسرائیل کے غزہ پر ممکنہ فوجی قبضے اور مقبوضہ مغربی کنارے کے الحاق میں تیزی لانے کے منصوبوں کی بھی مخالفت کی اور فلسطینی عوام کے حق خود ارادیت کی حمایت کا اعادہ کیا۔
