اسلام آباد (لارڈ میڈیا) الیکشن کمیشن نے اسلام آباد کی یونین کونسلز کی حلقہ بندیوں کا نظرثانی شدہ شیڈول جاری کر دیا ہے۔ الیکشن کمیشن کے مطابق حلقہ بندیوں کی ابتدائی فہرست 27 اگست کو شائع کی جائے گی، جس کے بعد شہری اور متعلقہ ووٹرز اعتراضات اور تجاویز جمع کرا سکیں گے۔
شیڈول کے مطابق 28 اگست سے اعتراضات جمع کرانے کا عمل شروع ہو گا، جو 17 ستمبر تک جاری رہے گا۔ الیکشن کمیشن نے واضح کیا ہے کہ مقررہ مدت کے دوران موصول ہونے والے اعتراضات اور تجاویز پر قانون کے مطابق کارروائی کی جائے گی۔
اعتراضات پر فیصلے 2 اکتوبر کو کیے جائیں گے، جس کے بعد حلقہ بندیوں کے عمل کو حتمی شکل دی جائے گی۔ الیکشن کمیشن نے بتایا کہ حتمی فہرست 14 اکتوبر کو شائع کی جائے گی۔
الیکشن کمیشن نے شہریوں کو ہدایت کی ہے کہ وہ مقررہ تاریخوں کے دوران حلقہ بندیوں کی ابتدائی فہرست کا جائزہ لیں اور اعتراضات یا تجاویز مقررہ مدت کے اندر جمع کرائیں۔
