تہران (لارڈ میڈیا) ایران نے جنوبی صوبہ فارس میں گیس کا ایک بڑا ذخیرہ دریافت کیا ہے، جس کا تخمینہ تقریباً 5.7 ٹریلین مکعب فٹ ہے۔ وزیر پیٹرولیم محسن پاک نژاد نے بتایا کہ یہ ذخائر تقریباً 7.5 ٹریلین مکعب فٹ گیس پر مشتمل ہیں، جن میں سے قابل بازیافت گیس کی مقدار جنوبی پارس گیس فیلڈ کے پہلے مرحلے کی 15 سالہ پیداوار کے برابر ہے۔
محسن پاک نژاد نے سرکاری ٹیلی ویژن کو انٹرویو میں کہا کہ تخت اے فیلڈ میں دریافت ہونے والی گیس میں سلفر مرکبات کی مقدار کم ہے، جس سے ترقی اور آپریشن کے اخراجات کم ہوں گے۔ انہوں نے مزید بتایا کہ اس دریافت میں گیس کنڈینسیٹ کی بھی بڑی مقدار شامل ہے، جو قیمتی ہائیڈرو کاربن مائع ہے۔
ایرانی وزیر کے مطابق ان ذخائر کی مالیت سیکڑوں ارب ڈالر ہے اور یہ ملک کے لیے دولت کا نیا ذریعہ ثابت ہوں گے۔ حکومت اس فیلڈ کی ترقی کے لیے فوری اقدامات کرنے کا ارادہ رکھتی ہے تاکہ جلد از جلد پیداوار شروع کی جا سکے۔
رپورٹ کے مطابق، جنوبی صوبے میں یہ دریافت ایران کو قدرتی گیس کا اضافی ذریعہ فراہم کر سکتی ہے، خاص طور پر ایسے وقت میں جب ملک مقامی پیداوار میں اضافے کی کوشش کر رہا ہے۔ ایران نے 2018 میں امریکی پابندیوں کے بعد سے مقامی سرمایہ کاری اور ملکی ماہرین پر انحصار بڑھا دیا ہے۔
