بیجنگ (شِنہوا) چین نے نیپال-چین سرحد پر واقع ایک پورٹ پر مٹی کا تودہ گرنے کے بعد جنوب مغربی چین کے شی زانگ خود مختار علاقے کی گیرونگ کاؤنٹی کے متاثرہ علاقوں میں امدادی کارروائیوں کے لئے اپنے قومی ڈیٹا مراکز کو ہنگامی خدمات فراہم کرنے کے لئے متحرک کر دیا ہے۔
قومی کرائیوسفیئر ڈیزرٹ ڈیٹا سنٹر (این سی ڈی سی) اب تک 53 سروس ڈیٹا سیٹس فراہم کر چکا ہے، جن کا مجموعی حجم تقریباً 85 جی بی ہے۔ یہ ڈیٹا متعلقہ ہنگامی ردعمل، امدادی اور تحقیقی اداروں کے ڈاؤن لوڈ اور استعمال کے لئے دستیاب ہے۔
یہ ڈیٹا متعدد تحقیقی اداروں سے حاصل کیا گیا ہے، جن میں قومی کرائیوسفیئر ڈیزرٹ ڈیٹا سنٹر، قومی زلزلہ ڈیٹا سنٹر، نیشنل سیٹلائٹ اوشن ایپلیکیشن سروس اور چائنہ سنٹر فار ریسورسز سیٹلائٹ ڈیٹا اینڈ ایپلیکیشن شامل ہیں۔
قومی ارتھ آبزرویشن ڈیٹا سنٹر نے شہری اور تجارتی سیٹلائٹس سے حاصل کردہ ریموٹ سینسنگ ڈیٹا کے وسائل بھی مرتب کئے ہیں، جن کا مجموعی حجم 20 جی بی سے زائد ہے۔ یہ ڈیٹا آفت کے بعد سڑکوں کو پہنچنے والے نقصان کا جائزہ لینے، عمارتوں کے منہدم ہونے کی نشاندہی اور ثانوی آفات کی نگرانی میں معاونت کے لئے فراہم کیا گیا ہے۔
یہ مشترکہ ڈیٹا سیٹس قدرتی آفات سے نمٹنے کی کوششوں میں ٹیکنالوجی سے فائدہ اٹھانے کے لئے چین کی جاری کوششوں کا حصہ ہیں۔ چائنہ نیشنل اسپیس ایڈمنسٹریشن کے مطابق اس نے مٹی کے تودے سے متاثرہ علاقے کی ہنگامی تصاویر حاصل کرنے اور علاقے کی تاریخی تصاویر جمع کرنے کے لئے سیٹلائٹ وسائل کو مربوط اور بروئے کار لایا ہے۔
