کراچی (لارڈ میڈیا): پاکستانی معیشت کے لئے بحری شعبے میں 6 سے 9 ارب ڈالر کی سرمایہ کاری کی توقع ہے۔ وفاقی وزیر برائے بحری امور جنید انوار چودھری نے بتایا ہے کہ بدلتی شپنگ سرگرمیوں کے باعث پاکستان عالمی سرمایہ کاروں کی توجہ کا مرکز بن چکا ہے۔
جنید انوار چودھری کے مطابق مختلف کارگو ٹرمینلز، ایل این جی، آئل اور کنٹینر ٹرمینلز کی تعمیر کے لئے سرمایہ کاری کی تجاویز موصول ہوئی ہیں۔ انہوں نے کہا کہ پاکستان کی جغرافیائی اہمیت کے باعث بحری شعبے کو مستقل علاقائی میری ٹائم ہب بنایا جائے گا، جس نے گزشتہ مالی سال میں 39.6 کروڑ ڈالر منافع حاصل کیا۔
وفاقی وزیر نے بتایا کہ نیشنل پورٹس ماسٹر پلان کے تحت بنکرنگ سہولیات، آف ڈاک ٹرمینلز اور اضافی ٹرانس شپمنٹ صلاحیت تیار کی جا رہی ہے۔ ان کا مقصد زرمبادلہ، صنعتی ترقی اور روزگار کے مواقع میں اضافہ کرنا ہے۔
حکومت نے 2047 تک پاکستان کی میری ٹائم معیشت کو 100 ارب ڈالر تک لے جانے کا ہدف مقرر کیا ہے۔ ماہرین کے مطابق یہ سرمایہ کاری اور جدید منصوبے پاکستان کو عالمی تجارت اور علاقائی روابط کا مضبوط مرکز بنائیں گے۔
