کویت کے چینی ثقافتی مرکز میں اتوار کی شام چینی و کویتی چائے کے فن اور لذیذ اشیا چکھنے کی تقریب منعقد ہوئی جس میں 150 سے زائد افراد نے شرکت کی۔ شرکاء مختلف اقسام کی چائے اور مٹھائیوں سے لطف اندوز ہوئے اور اس کے ساتھ ساتھ انہوں نے دونوں ممالک میں چائے بنانے کی روایات کے بارے میں آگاہی بھی حاصل کی۔
یہ تقریب کویت میں چینی ثقافتی مرکز اور کویت کی نیشنل کونسل فار کلچر، آرٹس اینڈ لیٹرز (این سی سی اے ایل) نے مشترکہ طور پر منعقد کی جو کویت کے 18ویں سمر کلچرل فیسٹیول کا حصہ تھی۔ اس تقریب کا مقصد چین اور کویت میں چائے سے متعلق روایات کو متعارف کرانا اور دونوں ممالک کے درمیان ثقافتی و عوامی سطح پر تبادلوں کو فروغ دینا تھا۔
شرکاء نے چینی مٹھائیوں کے ساتھ چین کی سبز، کالی، سفید اور اولونگ چائے بھی چکھی۔ ایک الگ حصے میں کویتی اور عرب مشروبات بھی پیش کئے گئے جن میں کڑک چائے، لومی چائے اور مراکشی پودینے کی چائے شامل تھیں۔ اس کے ساتھ مقامی اور عرب مٹھائیاں بھی پیش کی گئیں۔
تقریب سے خطاب کرتے ہوئے کویت میں چین کے سفیر یانگ شِن نے کہا کہ رواں برس دونوں ممالک کے درمیان سفارتی تعلقات کے قیام کی 55ویں سالگرہ منائی جا رہی ہے۔ انہوں نے کہا کہ ثقافتی تبادلے ’’دونوں ممالک کے عوام کے دلوں کو جوڑنے والے پل‘‘ بن گئے ہیں۔
تقریب کے اختتام پر شِنہوا سے گفتگو کرتے ہوئے یانگ نے کہا کہ یہ تقریب ’’چین کی قدیم اور دیرینہ ثقافت کی ایک جھلک دکھانے اور چین، کویت اور عرب دنیا کے درمیان ثقافتی تبادلوں اور دوستی کو فروغ دینے کا ذریعہ‘‘ ہے۔
این سی سی اے ایل کے سیکرٹری جنرل محمد الجسار نے کہا کہ چینی چائے کے ساتھ کویتی اور عرب چائے کی روایات پیش کرنے سے مختلف ثقافتوں کے درمیان روابط اور روزمرہ زندگی کی مشترکہ روایات کے درمیان روابط کی عکاسی ہوتی ہے۔
الجسار نے کہا کہ چینی چائے کی تقریب چین کی حقیقی ثقافت کے ایک مستند پہلو کی جھلک دکھاتی ہے اور ایسی رسومات اور اقدار کو اجاگر کرتی ہے جو نسل در نسل منتقل ہوتی آئی ہیں۔
کویت میں چینی ثقافتی مرکز کے ڈائریکٹر لیو جِن ہونگ نے کہا کہ مرکز کو اس بات پر خوشی ہے کہ ’’چین اور کویت کی بھرپور چائے کی ثقافتوں کو متعارف کرانے کے لئےچائے ایک پل کا کردار ادا کر رہی ہے۔‘‘ انہوں نے کہا کہ مہمانوں کا چائے پیش کرکے استقبال کرنے کی روایت دونوں ثقافتوں میں ایک مشترکہ قدر کی حیثیت رکھتی ہے۔
کویتی چائے کی ثقافت کی ماہر سارہ ماہر المجید، جو چائے کی سند یافتہ ماہر اور ٹی ماسٹر ہیں نے عرب چائے کی ثقافت پر ایک پریزنٹیشن دی۔ انہوں نے اپنی گفتگو کا آغاز ان تجارتی اور ثقافتی راستوں کے جائزے سے کیا جن کے ذریعے چائے چین سے عرب دنیا تک پہنچی۔
تقریب میں ایک سیاحتی بوتھ بھی قائم کیا گیا جہاں چین میں چائے کی ثقافت سے متعلق سیاحتی راستوں اور وسائل کو اجاگر کیا گیا۔ یہ تقریب ’’ٹی فار ہارمنی‘‘ پروگرام کا حصہ تھی جسے کویت میں چینی ثقافتی مرکز نے پورے سال 2026 کے دوران منعقد کیا ہے۔
کویت سٹی سے شِنہوا نیوز ایجنسی کے نمائندگان کی رپورٹ
