تہران (لارڈ میڈیا): ایران کے وزیر خارجہ عباس عراقچی نے خبردار کیا ہے کہ اگر ایران کے خلاف دھمکیوں اور دباؤ کا سلسلہ جاری رہا تو امریکا کے ساتھ مجوزہ حتمی معاہدے پر مذاکرات کا آغاز ممکن نہیں ہوگا۔ عراقچی نے کہا کہ مفاہمتی یادداشت کی شق نمبر 13 بالکل واضح ہے، اور کسی بھی فریق کی جانب سے دھمکی آمیز رویہ برقرار رہا تو حتمی معاہدے کے لیے باضابطہ مذاکرات شروع نہیں کیے جائیں گے۔
انہوں نے متعلقہ فریقوں کو اپنے دستخط اور وعدوں کی پاسداری کا مشورہ دیتے ہوئے معاہدے میں شامل شرائط پر مکمل عمل درآمد کی تاکید کی۔
عباس عراقچی نے کہا کہ ایرانی عوام اور مسلح افواج کسی بھی قسم کی دھمکی یا دباؤ سے مرعوب نہیں ہوں گے اور ایران اپنے قومی مفادات، خودمختاری اور سلامتی کے تحفظ پر کوئی سمجھوتہ نہیں کرے گا۔
عراقچی نے شہید سپریم لیڈر علی خامنہ ای کی آخری رسومات کا ذکر کرتے ہوئے کہا کہ لاکھوں ایرانی شہری اتحاد اور یکجہتی کے ساتھ جمع ہوئے تاکہ وہ اپنے رہنما اور ان کے ورثے کو خراج عقیدت پیش کر سکیں۔
سیاسی مبصرین کے مطابق عراقچی کا بیان ایسے وقت میں آیا ہے جب ایران اور امریکا کے درمیان مستقبل کے معاہدے اور خطے کی سلامتی سے متعلق سفارتی رابطے جاری ہیں، تاہم دونوں ممالک کے درمیان اعتماد کی بحالی اب بھی ایک بڑا چیلنج بنی ہوئی ہے۔
