لندن (لارڈ میڈیا): فٹ بال ورلڈ کپ کے دوران میچ دیکھنا نہ صرف تفریح کا ذریعہ ہوتا ہے بلکہ نئی تحقیق کے مطابق یہ ذہنی اور جسمانی صحت کے لیے بھی فائدہ مند ہے۔ اینگلیا رسکن یونیورسٹی کی 2023 میں شائع ہونے والی رپورٹ کے مطابق، براہ راست کھیلوں کے مقابلے دیکھنے والے افراد زیادہ مطمئن رہتے ہیں، تنہائی کا کم شکار ہوتے ہیں اور ان کی ذہنی صحت بہتر ہوتی ہے۔
تحقیق میں 16 سے 85 سال کی عمر کے 7,209 افراد کے ڈیٹا کا جائزہ لیا گیا، جس سے یہ ثابت ہوا کہ کھیلوں کے ایونٹس میں شرکت کرنے والوں نے اپنی زندگی کو زیادہ بامعنی قرار دیا۔ ماہرین کے مطابق کھیلوں کے مقابلے دیکھنا بہتر جسمانی صحت، بیماریوں کے کم خطرے اور طویل عمر سے بھی منسلک ہو سکتا ہے۔
سنگاپور کے ریفلز میڈیکل گروپ کے مطابق، چاہے میچ اسٹیڈیم میں دیکھا جائے یا ٹی وی اور موبائل پر، یہ دماغ کے وہ حصے متحرک کرتا ہے جن کا تعلق جسمانی حرکت سے ہے۔ شکاگو یونیورسٹی کی ایک تحقیق میں بھی بتایا گیا ہے کہ میچ دیکھتے ہوئے دماغ میں وہی اعصابی راستے سرگرم ہو جاتے ہیں جو جسمانی سرگرمی کے دوران فعال ہوتے ہیں۔
ماہرین کا کہنا ہے کہ اپنی پسندیدہ ٹیم کی کامیابی پر خوشی محسوس کرنا اور دوسرے شائقین کے ساتھ مل کر میچ دیکھنا سماجی تعلقات کو مضبوط بنانے، خوشی کے احساس میں اضافہ کرنے اور تنہائی کم کرنے میں مددگار ثابت ہو سکتا ہے۔
