لندن (لارڈ میڈیا): برطانیہ کی ایک عدالت نے فلسطین کے حامی چار کارکنوں کو اسرائیلی اسلحہ ساز کمپنی ایلبٹ سسٹمز کے برطانیہ میں قائم کارخانے پر 2024 میں حملہ کرنے کے الزام میں طویل قید کی سزائیں سنا دی ہیں۔
یہ کارروائی برسٹل کے قریب واقع ایلبٹ سسٹمز یو کے کی فیکٹری میں کی گئی تھی، جہاں فلسطین ایکشن نامی تنظیم کے کارکنوں نے اسرائیلی اسلحے کو نقصان پہنچایا۔
جج جیریمی جانسن نے کہا کہ اس جرم کا تعلق دہشت گردی سے ہے اور ملزمان کا مقصد برطانوی حکومت کو اسرائیل کی حمایت ختم کرنے پر مجبور کرنا تھا۔
استغاثہ کے مطابق، کارکنوں کی کارروائی سے اسرائیلی کمپنی کو 10 لاکھ پاؤنڈ سے زائد کا نقصان پہنچا۔ سزا پانے والوں میں شارلٹ ہیڈ، سیموئل کارنر، لیونا کامیو اور فاطمہ زینب رجوانی شامل ہیں۔
عدالت نے سیموئل کارنر کو سات سال اور آٹھ ماہ کی قید سنائی، جبکہ فلسطین ایکشن نے کہا کہ ان کا مقصد ایسے ڈرونز کو ناکارہ بنانا تھا جو غزہ میں استعمال ہو سکتے ہیں۔
کارکنوں کی حمایت میں تقریباً 500 مظاہرین عدالت کے باہر جمع ہوئے، جن میں سے 72 کو بینرز اٹھانے پر پولیس نے گرفتار کیا۔
