واشنگٹن (لارڈ میڈیا): امریکہ کی کئی ریاستوں نے جون کے مہینے کو ‘خاندانی اقدار کا مہینہ’ قرار دے دیا ہے، جو ہم جنس پرستوں کے ‘پرائیڈ منتھ’ کے خلاف ایک متبادل اقدام کے طور پر سامنے آیا ہے۔
ریپبلکن حکمرانوں نے انڈیانا، ٹینیسی، اور الاباما سمیت کئی ریاستوں میں جون کو ‘فیملی منتھ’ کے طور پر منانے کا اعلان کیا ہے، جس کا مقصد روایتی خاندانی اقدار کو فروغ دینا ہے۔
یوتاہ اور آرکنساس نے جون کو ‘وفاداری کا مہینہ’ قرار دیا ہے، جس کا مقصد مذہب، خاندان اور وطن سے وابستگی کو اجاگر کرنا بتایا گیا ہے۔
ہم جنس پرستوں کے حامیوں کا کہنا ہے کہ یہ اقدامات پرائیڈ منتھ کا سیاسی جواب ہیں۔ تاہم، الاباما پرائیڈ کے صدر جوش کولمین نے کہا کہ پرائیڈ تقریبات معمول کے مطابق جاری رہیں گی۔
یاد رہے کہ پرائیڈ منتھ کی تاریخ 1969 کے اسٹون وال احتجاج سے جڑی ہوئی ہے، جو جدید ہم جنس پرست حقوق کی تحریک کا نقطۂ آغاز تصور کیا جاتا ہے۔
