جنوبی سوڈان میں پاکستانی امن دستے کا سیلابی خطرات میں اہم کردار

جنوبی سوڈان (لارڈ میڈیا): جنوبی سوڈان میں پاکستانی امن دستے شدید سیلابی خطرات کے باوجود قریباً 3 لاکھ افراد کی زندگیاں محفوظ بنانے میں اہم کردار ادا کر رہے ہیں۔ یہ اہلکار اقوام متحدہ کے امن مشن کے تحت بینتیو میں تعینات ہیں، جہاں وہ مٹی کے حفاظتی بندوں کی نگرانی اور مضبوطی میں مصروف ہیں تاکہ دریائے نیل کے بڑھتے پانی کو آبادیوں میں داخل ہونے سے روکا جا سکے۔ بینتیو میں دنیا کا سب سے بڑا اندرونِ ملک بے گھر افراد کا کیمپ قائم ہے، جہاں ہزاروں خاندان پناہ لیے ہوئے ہیں۔ حالیہ برسوں میں موسمیاتی تبدیلیوں کے باعث یہ علاقہ شدید سیلابوں کی زد میں رہا ہے، جس سے کئی بستیاں مکمل طور پر پانی میں ڈوب چکی ہیں۔ پاکستانی انجینئر پانی کی سطح، پشتوں کی مضبوطی اور ممکنہ شگافوں کا جائزہ لیتے ہیں تاکہ کسی بھی خطرے کا بروقت پتا چلایا جا سکے۔ پاکستانی انجینئرنگ کور مٹی کے حفاظتی پشتوں، رسد کے راستوں اور ہوائی پٹی کی حفاظت کو یقینی بنا رہی ہے تاکہ انسانی امداد متاثر نہ ہو۔ حکام کے مطابق معمولی سا شگاف بھی چند گھنٹوں میں بڑے پیمانے پر تباہی کا سبب بن سکتا ہے، اسی لیے نگرانی کا عمل مسلسل جاری رکھا جاتا ہے۔ مقامی آبادی کا کہنا ہے کہ یہ امن دستے ان کے لیے تحفظ اور امید کی علامت ہیں۔