گلف شورز (لارڈ میڈیا): امریکا کی ریاست الاباما کے گلف شورز انٹرنیشنل ایئرپورٹ پر ایک انوکھا واقعہ پیش آیا جب ایک دادی کے سامان سے پانچ توپ کے گولے برآمد ہوئے۔ یہ گولے امریکی خانہ جنگی کے دور کے چوری شدہ نوادرات ثابت ہوئے۔
ٹرانسپورٹیشن سیکیورٹی ایڈمنسٹریشن (ٹی ایس اے) کے اہلکار نے 18 جولائی کو ایکس رے اسکیننگ کے دوران بیگ میں ایک مشتبہ شے دیکھی، جس پر مزید تلاشی لینے پر کاغذی تولیوں میں لپٹے پانچ توپ کے گولے ملے۔
ٹی ایس اے اہلکار جسٹن ڈوپری نے کہا کہ یہ ان کے لیے پہلی بار تھا کہ تاریخی اور چوری شدہ نوادرات ملے ہیں۔ گولے غیر فعال تھے اور ان میں دھماکا خیز مواد شامل نہیں تھا، لیکن فوجی گولہ بارود شمار ہونے کی وجہ سے طیارے میں لے جانے کی اجازت نہیں تھی۔
پولیس کی تحقیقات میں پتہ چلا کہ یہ توپ کے گولے فورٹ مورگن سے چرائے گئے تھے، جن کی شناخت مخصوص رنگی نشانات کی مدد سے کی گئی۔ بالڈون کاؤنٹی شیرف آفس کے مطابق ایک کم عمر لڑکے نے یہ گولے چوری کر کے دادی کے بیگ میں رکھ دیے تھے۔
