مظفرآباد (لارڈ میڈیا) چیئرمین پیپلز پارٹی بلاول بھٹو زرداری نے آزاد کشمیر الیکشن میں میرپور اور کوٹلی کے ووٹ پر ڈاکہ مارنے کا الزام لگایا ہے۔ انہوں نے کہا کہ ریاست کو فیصلہ کرنا ہوگا کہ قومی مفاد زیادہ اہم ہے یا ن لیگ کا مفاد۔ بلاول نے پیپلز پارٹی کے ورکرز کنونشن میں خطاب کے دوران کہا کہ آزاد کشمیر میں جو کچھ ہو رہا ہے اسے جمہوریت نہیں کہا جا سکتا۔ انہوں نے میرپور کے عوام کا شکریہ ادا کرتے ہوئے کہا کہ ریاست کے فیصلے ن لیگ کو ترجیح دے رہے ہیں جس کا نقصان کشمیر، پاکستان اور اس کے عوام کو ہو رہا ہے۔
بلاول بھٹو زرداری نے کہا کہ انٹرنیٹ بند کرنے سے آزاد کشمیر کو مقبوضہ کشمیر جیسا بنا دیا جا رہا ہے اور قومی مفاد کو ن لیگ کے مفاد پر ترجیح دی جا رہی ہے۔ انہوں نے کہا کہ ہمیں صاف و شفاف انتخابات کرانے کی ضرورت ہے اور کشمیر کاز کو بچانے کے لیے پیپلز پارٹی کی مفاہمتی پالیسی تسلیم کی جانی چاہیے۔
بلاول نے کہا کہ ہم اپنے کارکنوں کی جانیں ضائع ہوتے نہیں دیکھ سکتے اور ان کے حق کے لیے لڑیں گے۔ انہوں نے سوال اٹھایا کہ سکیورٹی کے باوجود 30 پولنگ اسٹیشنز پر حملے کیسے ہوئے اور اس کو مرحلہ وار الیکشن دھاندلی قرار دیا۔
دوسری جانب سابق وزیراعظم راجہ پرویز اشرف نے بھی ن لیگ پر انتخابات میں دھاندلی کا الزام عائد کیا۔ انہوں نے کہا کہ ن لیگ نے اپنے ہاتھوں سے ٹھپے لگائے اور جہاں پچیس فیصد سے زیادہ ٹرن آوٹ نہیں تھا وہاں نوے فیصد کیسے ممکن ہوا۔ انہوں نے کہا کہ اس طرح کی چیزیں جمہوریت کے نقصان کا باعث بنتی ہیں۔
