لوجان، ارجنٹینا (شِنہوا) روایتی چینی موسیقی، رقص، کھانوں اور مارشل آرٹس نے اتوار کو بیونس آئرس سے تقریباً 70 کلومیٹر مغرب میں واقع شہر لوجان میں ہزاروں افراد کو ایک رنگا رنگ ثقافتی میلے کی جانب متوجہ کیا۔
"چین لوجان میں” کے عنوان سے یہ میلہ امیگھینو پارک میں منعقدہ ہوا جو 2024 سے مسلسل تیسرے سال منعقد کیا گیا۔
پروگرام میں ڈریگن اور شیر رقص، چینی مارشل آرٹس، روایتی آلات پر براہ راست موسیقی، کھانوں کے سٹالز اور چینی روایتی لباس کی نمائش شامل تھی۔
لوجان کے سیکرٹری برائے ثقافت و سیاحت نکولس کیپیلی نے اس تقریب کو نہ صرف ایک سیاحتی کشش بلکہ چینی شہر تائی ژو کے ساتھ کئی برسوں پر محیط ثقافتی تبادلے کے عمل کا حصہ قرار دیا۔
کیپیلی نے شِنہوا سے گفتگو کرتے ہوئے بتایا کہ ہر سال یہ میلہ مزید بڑا اور زیادہ رنگا رنگ ہوتا جا رہا ہے۔
انہوں نے کہا کہ صوبہ بیونس آئرس کے دیگر شہروں نے بھی اس طرز کی تقریبات منعقد کرنے میں دلچسپی ظاہر کی ہے جو چین کے ساتھ ثقافتی تبادلوں میں بڑھتی ہوئی دلچسپی کی علامت ہے۔
مارشل آرٹس کے مظاہروں کی قیادت ارجنٹائن ووشو کلب نے کی، جسے 2008 میں چینی استاد چھن من نے قائم کیا تھا۔
چھن من نے کہا کہ اس قسم کی تقریبات دونوں ممالک کے عوام کو ایک دوسرے کے قریب لانے اور باہمی سمجھ بوجھ بڑھانے میں مدد دیتی ہیں۔
انہوں نے شِنہوا سے گفتگو کرتے ہوئے کہا کہ چینی ثقافت بہت وسیع ہے اور اس کی تاریخ پانچ ہزار سال سے زیادہ پرانی ہے۔ ایسے مواقع ہمیں ایک دوسرے کو بہتر طور پر سمجھنے میں مدد دیتے ہیں۔
میلے میں روایتی چینی ساز گوژینگ پر موسیقی، ٹینگو رقص کا مظاہرہ اور شرکاء کے لئے تحائف کی سرگرمیاں بھی شامل تھیں۔
اس تقریب کا اہتمام لوجان کے ثقافت و سیاحت کے بلدیاتی دفتر اور ارجنٹائن ووشو کلب نے ارجنٹائن ووشو فیڈریشن اور دیگر اداروں کے تعاون سے کیا تھا۔
