مدرید (لارڈ میڈیا): نیٹ فلکس نے 2030 کے فٹبال ورلڈ کپ کے نشریاتی حقوق حاصل کر لیے ہیں اور اسپین و انڈورا میں میچ نشر کرنے کا اعلان کیا ہے۔ یہ پہلی بار ہوگا کہ نیٹ فلکس اسپین میں کسی بڑے بین الاقوامی فٹبال ٹورنامنٹ کے میچ نشر کرے گا۔
نیٹ فلکس نے اعلان کیا ہے کہ اسپین میں ناظرین کو ورلڈ کپ کے دوران ہر روز ایک میچ مفت دیکھنے کا موقع ملے گا۔ کمپنی ایک مفت ٹی وی چینل بھی فراہم کرے گی جس پر اسپین کی ٹیم کے تمام مقابلے، دونوں سیمی فائنلز اور فائنل نشر ہوں گے۔
تاہم، کمپنی نے ابھی یہ واضح نہیں کیا کہ مفت نشریات کے لیے کون سا چینل استعمال ہوگا۔ اسپین کے سرکاری ٹی وی نیٹ ورک ٹی وی ای نے اس بارے میں کوئی تبصرہ نہیں کیا کہ آیا وہ مزید نشریاتی حقوق خریدنے میں دلچسپی رکھتے ہیں یا نہیں۔
نیٹ فلکس، جو فلموں اور ڈراموں کی نشریات کے لیے معروف ہے، اب کھیلوں کی براہ راست نشریات میں بھی اپنی جگہ بنا رہا ہے۔ کمپنی پہلے ہی امریکی فٹبال لیگ این ایف ایل، بیس بال، ڈبلیو ڈبلیو ای، باکسنگ اور ایم ایم اے کے پروگرام نشر کر رہی ہے۔
نیٹ فلکس کے پاس امریکا اور کینیڈا میں 2027 کے ویمنز فٹبال ورلڈ کپ کے نشریاتی حقوق بھی ہیں، جبکہ 2031 کے ویمنز ورلڈ کپ کے حقوق کوسٹا ریکا، جمیکا، میکسیکو اور امریکا میں نیٹ فلکس کے پاس ہیں۔ نیٹ فلکس کی یہ پیش قدمی روایتی ٹی وی چینلز کو مدمقابل فراہم کر رہی ہے۔
