سینٹ پیٹرزبرگ (لارڈ میڈیا): روس کے صدر ولادیمیر پوتن نے کہا ہے کہ یوکرین کے ساتھ مذاکرات کی بحالی کا فیصلہ روسی مفادات کے تحت کیا جائے گا۔ سینٹ پیٹرزبرگ میں گفتگو کرتے ہوئے پوتن نے کہا کہ یوکرین نے استنبول میں جاری مذاکرات منقطع کیے تھے، لیکن اب دوبارہ آمادگی ظاہر کی ہے۔
پوتن نے مزید کہا کہ ریاستی دوما کے انتخابات کے بعد روس مذاکرات کے لئے تیار ہے، حالانکہ انتخابات کے دوران ماسکو پر حملے کی کوشش کی گئی۔ پوتن نے کہا کہ ان حملوں میں پولنگ اسٹیشن اور دیگر مقامات کو نشانہ بنایا گیا۔
روسی صدر نے کہا کہ ان حملوں کے جواب میں روس نے جوابی کارروائیاں کیں جو مخالفین کے لئے تباہ کن ثابت ہوئیں۔ انہوں نے بتایا کہ یوکرین اب توانائی کے شعبے میں جنگ بندی کی بات کر رہا ہے اور بحیرہ اسود کی ناکہ بندی ختم کرانے کی کوشش کر رہا ہے۔
پوتن نے یورپی ممالک پر روس مخالف بیانات دینے کا الزام لگایا اور کہا کہ روس کے پاس یورپ کے خلاف کوئی فوجی منصوبہ نہیں ہے۔ انہوں نے کہا کہ روس اپنے ہم وطنوں کے حقوق کے لئے بین الاقوامی قانون کے دائرے میں جدوجہد جاری رکھے گا۔
چین اور امریکا کے درمیان مذاکرات پر تبصرہ کرتے ہوئے پوتن نے کہا کہ روس اس کا خیرمقدم کرتا ہے کیونکہ ان کے معاہدوں کے اثرات عالمی معیشت پر مرتب ہوں گے۔
