بیجنگ (شِنہوا) چین میں سات سال سے مقیم روسی خاتون ایلیزاویٹا نے اپنے سوشل میڈیا اکاؤنٹ پر لکھا کہ اگر آپ سمجھتے ہیں کہ آپ نے بیجنگ دیکھ لیا ہے تو آپ ابھی یہاں نہیں آئے۔
وہ جس جگہ کا ذکر کر رہی تھی، وہ ایک کمرشل عمارت کی چھت پر بنا ٹیرس ہے جو 15ویں صدی کی بدھ عبادت گاہ لانگ فو مندر کی اصل جگہ پر قائم ہے۔ اب یہ جگہ ایک متحرک ثقافتی مرکز کا حصہ ہے۔ یہاں قائم ٹیرس بیجنگ کے بہترین نظاروں میں سے ایک پیش کرتا ہے جہاں شہر کی تاریخ اور جدت ایک ہی جھلک میں دکھائی دیتی ہیں۔
مشرق کی جانب بیجنگ کی شیشے اور سٹیل سے بنی بلند عمارتیں افق پر نظر آتی ہیں جبکہ مغرب میں شہر کا قدیم حصہ واقع ہے، جہاں پیلس میوزیم کی چمکتی ہوئی ٹائلوں والی چھتیں، جنگ شان پہاڑی کی سرسبز ڈھلوانیں اور دور بے ہائی پارک کا بدھ مت کی عبادت گاہ کا سفید مینار پاگوڈا دکھائی دیتا ہے۔
ایلیزاویٹا نے لکھا کہ ایک لمحے کے لئے مجھے واقعی ایسا محسوس ہوتا ہے جیسے میں دو ادوار کے سنگم پر کھڑی ہوں۔
یہ ٹیرس شہر میں جاری ایک وسیع تر تبدیلی کی عکاسی کرتا ہے۔ رواں سال کے آغاز میں بیجنگ نے اعلیٰ معیار کی شہری ترقی کا منصوبہ جاری کیا، جس میں تاریخی گلیوں اور صنعتی ورثے کے بہتر استعمال، اہم تجارتی علاقوں کی بہتری اور خریداری و تفریح کے نئے مواقع پیدا کرنے کا عزم کیا گیا۔ یہ اقدام 2030 تک ملک بھر کے 1,500 پرانے رہائشی اور صنعتی علاقوں کو خریداری اور ثقافت کے نئے مراکز میں تبدیل کرنے کی قومی کوشش کا حصہ ہے۔
عمارتوں کی بلندی کی مقررہ حدود کے باعث بیجنگ کے مرکزی علاقوں میں ایک نسبتاً کم بلند شہر کا منظر برقرار ہے، جہاں شاہی سرخ دیواریں، زرد ٹائلوں والی چھتیں اور روایتی گلیاں نمایاں ہیں اور لوگ آج بھی گھنے سبزے کے درمیان رہتے ہیں۔ یہ کھلے مناظر سیاحوں کو شہر کے منفرد تعمیراتی ورثے کو قریب سے دیکھنے کے بھرپور مواقع فراہم کرتے ہیں۔
شہری تجدید کی کوششوں کے تحت بیجنگ کے ضلع ڈونگ چھینگ نے جہاں دارالحکومت کے بہت سے تاریخی مقامات اور سی حہ یوآن یعنی روایتی چار دیواری والے صحن نما گھر موجود ہیں، 2025 میں "بریز ٹیرس” منصوبہ شروع کیا۔ اس کا مقصد غیر استعمال شدہ چھتوں کو عوامی اجتماعات کی جگہوں میں تبدیل کرنا ہے۔
حکومت، مقامی رہائشیوں اور کاروباری افراد نے مل کر چھتوں پر نظارے دیکھنے کے مقامات، مطالعے کے گوشے، کھانے کی جگہیں اور دستکاری کی ورکشاپس قائم کی ہیں۔ منصوبہ سازوں کے مطابق اس اقدام کا مقصد بڑے پیمانے پر توڑ پھوڑ یا تعمیر کے بغیر لوگوں کو شہر کو ایک نئے زاویے سے دیکھنے کا موقع فراہم کرنا ہے۔
