نیویارک (لارڈ میڈیا): حالیہ تحقیق کے مطابق ترقی یافتہ ممالک میں انسانوں کی ذہانت یا آئی کیو ٹیسٹ کے نتائج میں بہتری کا سلسلہ رک گیا ہے، جسے ‘ریورس فلن ایفیکٹ’ کہا جا رہا ہے۔ یہ تحقیق معروف سائنسی جریدے ‘انٹیلیجنس’ میں شائع ہوئی ہے۔
تحقیق سے معلوم ہوا ہے کہ امریکا، برطانیہ، ناروے، ڈنمارک اور فن لینڈ جیسے ممالک میں کچھ ذہانت کے ٹیسٹوں کے نتائج میں کمی دیکھی گئی ہے۔ تاہم محققین کا کہنا ہے کہ انسانوں کی جینیاتی ساخت میں کوئی منفی تبدیلی نہیں آئی، بلکہ یہ تبدیلیاں ماحول، تعلیمی نظام اور طرز زندگی کی وجہ سے ہو رہی ہیں۔
ماہرین کا کہنا ہے کہ جدید تعلیمی نظام میں تبدیلیاں، ڈجیٹل ٹیکنالوجی پر انحصار، کتابیں پڑھنے کا رجحان کم ہونا، انٹرنیٹ اور سوشل میڈیا کے اثرات، سماجی و معاشی عدم مساوات اور ماحولیاتی آلودگی ذہانت پر اثر انداز ہو رہے ہیں۔
مزید برآں، یہ ذہانت کے ٹیسٹ محض ریاضی، یادداشت اور مسائل حل کرنے کی صلاحیت کو ناپتے ہیں، جبکہ انسانی تخلیقی صلاحیتیں اور دیگر مہارتیں ان ٹیسٹوں میں شامل نہیں۔
ماہرین نے مزید تحقیق کی ضرورت پر زور دیا ہے تاکہ تعلیمی نظام کو بہتر بنایا جا سکے اور بچوں کی صحت مند نشوونما کو یقینی بنا کر آئندہ نسلوں کی ذہنی کارکردگی کو مضبوط بنایا جا سکے۔
