زیورخ (لارڈ میڈیا): فیفا کے سابق صدر جوزف بلاٹر نے نارویجن فٹ بال فیڈریشن کی صدر لز کلاوینیس کو فیفا کی صدارت کے لیے تجویز دی ہے، جبکہ موجودہ صدر جانی انفانٹینو پر تنقید جاری ہے۔ بلاٹر نے کہا ہے کہ فیفا میں اب خواتین کو قیادت کا موقع ملنا چاہیے۔
بلاٹر نے سوشل میڈیا پر کہا کہ لز کلاوینیس ایک قابل احترام شخصیت ہیں اور وہ ہمیشہ واضح اور اصولی مؤقف اختیار کرتی رہی ہیں۔ انہوں نے مزید کہا کہ وقت آ گیا ہے کہ خواتین فیفا کی قیادت سنبھالیں۔
لز کلاوینیس سابق پیشہ ور فٹ بال کھلاڑی ہیں اور اس وقت نارویجن فٹ بال فیڈریشن کی صدر ہیں۔ انہوں نے غزہ میں جاری جنگ کے دوران اسرائیل کو بین الاقوامی فٹ بال مقابلوں سے معطل کرنے کا مطالبہ کیا تھا۔
دوسری جانب جانی انفانٹینو اس وقت تنقید کی زد میں ہیں جب انہوں نے ورلڈ کپ کے تجارتی حقوق نجی سرمایہ کاروں کو فروخت کرنے کا اعلان کیا، جس پر مختلف فٹ بال تنظیموں اور یورپی فٹ بال حلقوں نے شدید ردعمل ظاہر کیا۔ بعض ایسوسی ایشنز نے ورلڈ کپ کے بائیکاٹ کی دھمکی دی، جس کے بعد انفانٹینو نے تجویز واپس لے لی۔
